Den un entrevista cu Sra. Seraida Pemberton, directora di Stichting Reclassering en Jeugdbescherming Aruba, e ta splica tocante e proyectonan cu Stichting Reclassering tin actualmente, problemanan social cu ta e raiz di criminalidad entre hobennan na Aruba y kico por haci pa ataca e problema aki.
Recientemente, den e ultimo añanan, por a tuma nota cu criminalidad entre hobennan na Aruba ta aumentando. Sra. Pemberton ta duna splicacion di e problemanan social cu hobennan ta enfrenta cu ta pone nan den e tipo di situacionnan delicado asina. “Tin basta problemanan social, entre otro hobennan cu no ta bayendo scol, hobennan cu no por haya trabao, dus nos ta papiando di hobennan no unicamente te cu 18 aña, pero bo por hib’e te cu 23, 24 aña, hasta te cu 25 aña cu ta den situacionnan basta delicado door di no por haya trabao of no por bay back scol”, el a bisa. “Esey ta hopi tension cu den nan tempo liber, nan no tin tempo liber tampoco. Eynan ta unda e pregunta ta, kico ta haci cu e hobennan aki?”
Sra. Pemberton ta splica cu no tin precisamente un aumento den e cantidad di hobennan cu ta haya nan mes den problema, pero tiki tiki ta mira cu e casonan ta birando hopi mas serio, hopi mas pisa, dus e tipo di hobennan ta cambiando y e calidad di crimen bao di e hobennan tambe ta cambiando y esey ta duna e señal cu e hobennan ta birando hopi mas duro, hopi mas sin norma y balor y pesey e crimennan ta birando mas y mas violento tambe.
Pero Sra. Pemberton ta bisa cu esey ta algo cu nan ta wak caba y for di aña pasa Stichting Reclassering ta señalando cu door di no haci nada pa cu esey, e aumento di tipo di criminalidad entre hoben ta loke tin como resultado di añanan cu a pasa.
E ta splica tambe cu problemanan mental entre hoben ta hunga un rol hopi grandi tambe, pero cu lastimamente na Aruba no tin hopi yudansa pa por ehempel hobennan adicto, hobennan cu problemanan di salud mental. E ta menciona cu si tin diferente instancianan cu ta trata ariba e area ey, pero e problema ta asina hopi cu e ta surpasa e cantidad di profesionalnan cu tin pa vang op e problema bao di e hobennan
“Stichting reclassering ta purba su maximo esfuerso pa haci diferente proyectonan pa vang op e problemanan bao di nos hobennan, pero nos no tin e hermentnan necesario. Mi ta bisa un di e puntonan cu reclassering ta bogando basta aña pe, anto mi kiermen hopi aña, ta cu mester bin un institucion na Aruba pa e hobennan aki. Dicon, pasobra manera mi ta bisa nos ta riparando un cambio den nos hobennan y guia ambulante, den sentido cu hoben ta bin oficina y bay back cas, e ta back den su mesun ambiente, anto cu esey ta bin tur e consecuencianan cu nos ta enfrentando aworaki. Nos ta keda boga cu mester bin un institucion pa nos hobennan unda bo por pone e hobennan aki aden, dus saca nan for di nan ambiente, pone nan den un institucion pa duna nan e guia y e tratamento necesario”, Sra. Pemberton ta splica.
Un di e programanan cu Stichting Reclassering ta ofrece ta e programa di sex offenders cu ta pa hendenan cu ta haya nan mes den problema cu husticia pa cu actonan contramoral. E programa ta un programa di 8 siman den gruponan chikito den cual ta duna nan informacion tocante kico nan a haci. “Dus e consecuencia pa su mes, consecuencia pa e victima, consecuencia pa comunidad, kico ta e efectonan specifico pa victimanan, dus eigenlijk yuda nan compronde nan comportacion, tuma responsabilidad pele y pa stop e comportacion negativo ey”, Sra. Pemberton ta splica. “E no ta un terapia, e ta mas tanto un programa informativo, anto durante e programa ta observa e participante y si tin mester di guia mas profundo e ora ey e ta wordo acopla na un psicologo”.
Na mei Stichting Reclassering a cumpli 60 aña y un campaña cu e stichting a lansa en conexion cu e celebracion aki ta un campaña pa recauda fondonan pa duna 60 hoben laptopnan chromebook pa e transicion di basisschool over na voorgezet onderwijs. “Nos tabata kier eigenlijk contribui na nan cambio door di duna nan un chromebook pa esey ta un stress menos pa e famia y pa e hoben mes”, e ta splica. “Nos a ripara cu hopi biaha e cambio di basisschool pa voorgezet ta e periodo den cual un hoben ta bay den un ambiente nobo, e ta haya influencia nan nobo, e ta haya amigonan nobo, dus e ta haya full un otro tipo di enseñansa anto eynan ta ora tin biaha algun hoben ta desekilibra mas pasobra ya e cambio ta un tiki mucho fuerte pa nan”.
Stichting Reclassering tin diferente proyectonan y un otro proyecto ta e mentorenproject den cual e stichting ta acopla boluntarionan den comunidad cu e hobennan di e stichting. “Esaki tambe ta un apelacion cu nos ta bisa nos mester di mas hende homber pa mentor pa nos acopla na nos hobennan”, el a bisa. “Nos a caba un programa den cual nos tin 12 mentor cu ta bay wordo acopla na nos hobennan, pero nos ta buscando mas hende homber, pasobra mayoria hobennan cu ta cay cera ta masculino, dus nos ta buscando mas hende homber mentoren”.
“Tambe, aworaki nos ta bezig cu un proyecto di toque de keda, dus hendenan cu a haya nan mes den problema cu husticia pa motibo cu nan a eigenlijk kibra e medida di toque de keda y nan a haya trabao comunitario pa haci y nos ta bezig cu esey caminata nos ta bay cu e gruponan haci proyectonan na diferente camindanan na Aruba limpi”, el a agrega.
Den luna di october Stichting Reclassering ta bay tin e siman di reclassering na october, caminda nan lo tin un campaña sorpresa cu ta bay lansa, pero Sra. Pemberton ta splica cu e campaña ta bay ta uno bastante grandi den direccion di salud mental di personanan cu ta comete delitonan contramoral.
