Aruba mester tene cuenta cu tres componente principal si kier logra siguridad di cuminda. E componentenan ta identifica pa e documento di Banco Mundial titula ‘Building Aruba’s Food Security during the COVID-19 Pandemic and Beyond.’

Conseho Social Economico a analisa e rapport cu tabata traha riba peticion di Gobierno na Banco Mundial y cu colaboracion di Direccion di Asuntonan Economico, Comercio y Industria, DEHZI, Santa Rosa y otro partnernan.

Banco Mundial a sugeri un strategia di siguridad di cuminda cu e meta pa stimula produccion local di cuminda y stimula desaroyo economico duradero.

Strategia pa wanta sla

E tres componentenan ta pa stimula produccion di cuminda na nivel comercial. Lo mester inverti den expansion di actividadnan cu comercialmente tin bida y tambe empresanan. Pa logra esaki lo mester revisa, identifica y selecta e proyectonan di inversion individual. E di dos componente ta cu mester stimula produccion di cuminda y agricultura denter di famianan y na nivel di comunidad, esta na escala micro. Y finalmente, duna sosten institucional y di maneho na e produccion di cuminda y sector di agricultura local pa garantisa e exito duradero.

E meta di e strategia di siguridad di cuminda ta pa traha riba un sector di agricultura fuerte y stimula siguridad di cuminda, como tambe diversifica economia y asina crea un capacidad nacional suficiente pa por wanta risiconan. Di e forma aki lo por maneha miho e recuperacionnan di shock como tambe amplia e resistencia di clima y reforsa esaki sistematicamente.

Incentivo fiscal

Dia 26 di april 2016 e Minister di Finanzas di e tempo ey a anuncia pa medio di un decreto ministerial cu kier stimula e crecemento di produccion den sector primario; purba logra reduccion di prijs di cuminda; promove inversion den sector primario door di entre otro elimina pago di belasting. E decreto ministerial ademas ta menciona cu mescos ta conta pa belasting riba ganashi y entrada, y dispensacion riba BBO y cualkier otro provision manera BAVP y BAZV.

E areglo special aki ta pa empresanan di agricultura, cria y pesca. Pues mester tin un actividad empresarial riba e tereno aki. Y mester demostra esaki na Servicio di Impuesto, entre otro pa medio di e extraccion di Camara di Comercio. Mas ainda, mester tin un permiso di establecimento. Pues, e areglo special no ta pa esnan cu ta haci e trabou aki como hobby of pa uso personal.

Conclusionnan

E crisis di COVID-19 a reforsa e necesidad pa seguridad di cuminda. Na e momentonan aki, e sector existente ta contribui masha poco na e Producto Bruto Nacional y tin casi ningun influencia riba economia local. Como tal, SER ta aplaudi cualkier paso pa stimula e sector.

SER ta constata tambe cu Gobierno ta haci esfuerso pa sostene produccion di agricultura local pa mehora e situacion actual di cuminda. Tin proposicionnan di maneho y iniciativanan cu ta stimula e sector, incluso riba e nivel fiscal.

Recomendacion

SER a bisa cu mester introduci un registracion obligatorio di tur actividad di produccion di agricultura, cria y pesca na Santa Rosa, hasta di esnan cu ta haci’e pa hobby. Di e forma aki por acumula dato riba produccion den e tres sectornan.

Productornan agrario, di cria y pesca mester haya acceso na medionan financiero pa nan produccion. Aki por pensa riba micro credito cu interes abou y un fondo chikito pa subsidio. SER ta referi na e Sustainable Development Goal 8.3 (SDG 8.3) cu ta referi na un maneho dirigi na desaroyo, pa sostene actividadnan productivo, creacion di cuponan laboral decente, empresaria chikito y mediano, creatividad y innovacion.

Mester introduci medidanan cu ta permiti actividadnan di e sectornan agricultura, cria y pesca por crece. Asina lo mester inverti den aspectonan di facilidad/institucional y di maneho pa garantisa e exito duradero di produccion di cuminda local y di agricultura. Empresarionan riba e isla mester ricibi sosten pa medio di tecnologia cu ta facilmente aplicabel y conocemento comercial. Aki por pensa con pa reforsa e infrastructura riba tera y pa suministro di awa, ehecuta investigacion di mercado, desaroyo di un mercado di cliente, y desaroyo di programa educativo/escolar riba agricultura y pesca.

Renbak

Irigacion alternativo pa agricultura y cria mester tey. Por ehempel, uso di awa purifica di e plantanan di purificacion y promove construccion di bakinan di awa, esta renbak.

SER ta conseha pa promove posibilidadnan educativo, den enseñansa basico, secundario y profesional, y percura cu tin mas conocemento riba tecnologia moderno den e sector agrario y sigura cu ta transferi conocemento riba desaroyo tecnologico. E pasonan fiscal y di estimulo mester bira conoci riba e isla pa di e forma aki por fomenta mas actividad den e sector primario.

Introduccion di un sistema di certificacion pa agricultura y cria manera ‘Good Agricultural Practices’ manera mercado internacional ta propone, pa medio di implementacion di proceduranan specifico pa asina percura cu consumidornan ta yega na nan cuminda of pa sigura cu e procesamento di e cuminda ta sigur y higienico, haciendo uzo di metodonan sostenibel.

Farm to table

Ta recomendabel pa stimula un miho cooperacion entre productornan y clientenan local, manera restaurant y supermercado. Un bon cooperacion por conduci na miho conexion cu tendencia ‘Farm to table’, of tambe conoci como ‘Farm to fork’ cu movecionnan social unda restaurantnan ta busca nan ingredientenan di agricultonan y criadonan local.

Santa Rosa mester ta miho ekipa cu medionan manera capacidad, personal y finanzas pa asina por funcciona miho y logra su metanan, mientras cu e estimulo di siguridad di cuminda mester ta enfoca riba e nivel comercial como tambe e famianan individual.

Segun Presidente di SER Tisa LaSorte y Secretario General Felix Bijlhout, e instituto ta di opinion cu stimula un sector agrario mas fuerte na interes di mas siguridad di cuminda mester bira un prioridad structural den e maneho social economico di Gobierno. Como tal, mester reserva mas fondo den presupuesto di Pais Aruba. E paso aki lo yuda Aruba bira mas resiliente y por reacciona hopi miho riba shocknan interno y externo.