SER ta considera haci un estudio riba impacto di imigracion riba mercado laboral

Cua ta e impacto cu imigracion tin riba economia di Corsou? Kico ta e efecto e proceso aki tin riba finansa di gobierno? Di cua forma ta aplica maneho pa integra trahadonan stranhero riba mercado laboral local? E maneho aki ta den concordancia cu esfuersonan cu ta wordo haci pa actualisa y modernisa mercado laboral local conforme loke a ser palabra cu Hulanda den e pakete di pais (Landspakket, y si esey ta e caso, con esaki ta relata su mes na e obhetivo strategico di e gabinete actual, manera formula den e programa di gobernacion pa e periodo 2022-2025, pa aumenta participacion laboral di ‘’yiunan di tera” durante e periodo di gobernacion aki? Ki tipo di formanan di cooperacion i of aliansanan strategico por ser establece pa responde di un forma eficaz riba ultimo desaroyonan cu tin den ámbito di migracion, participacion laboral y mobilidad laboral na Corsou?

Conseho Social Economico (SER) ta considerando e posibilidad pa haci un estudio extenso cu posiblemente lo por duna un contesta riba e preguntanan ariba menciona y otro preguntanan relata na nan. E estudio aki lo ta un continuacion di e simposio cu a tuma luga dia 9 y 10 di mei 2019 na Willemstad, Corsou, y cu a ser organisa conhuntamente cu e consehonan social economico di Aruba y di Sint Maarten, riba e tema central “Migracion y desaroyo economico; desafionan y opcionnan pa maneho”.

Entretanto, como resultadonan concreto di e simposio ey, SER di Corsou a publica dos estudio na 2020 y 2021. E prome estudio ta trata di e futuro di e seguro general di behes, AOV, caminda a analisa sostenebilidat di e fondo di AOV haciendo uso di diferente scenario di migracion (https://ser.cw/files/2020/03/036-2020-SER.pdf). E di dos estudio, realisa pa SER, a concentra su mes riba e contribucion cu olanan migratorio, a bini ta haci durante decadanan na desaroyo sosial-ekonómiko di Corsou (https://ser.cw/files/2021/06/054-2021-SER-1.pdf).

Entre otro, como consecuencia di e crisis di COVID-19 y e guera entre federacion Ruso y Ukrania, costonan di transporte na nivel mundial a aumenta drasticamente, igual cu prijsnan di combustibel y di grano, loke a conduci na un aumento di e tasa di inflacion na Corsou te na 5,1 porshento na juni 2022 (Oficina Central di Statistik, CBS) debi na e fuerte dependencia di importacion nan. Pa un parti, debi na e desaroyonan y acontesimentonan aki, e dinamica riba mercado laboral local tambe a cambia. E panorama ainda ta uno cu ta caracterisa su mes pa un nivel di desempleo general halto y inaceptabel (19,1%), specialmente bou di hobennan (42,2%), aunke tin señalnan positivo cu lo start cu proyectonan nobo cu lo conduci na aumento di empleo a mediano plaso. Tambe tin desaroyonan faborabel den e sector di hospitalidad – un di e pilarnan principal economico di e isla – caminda tambe ta spera ku esakinan lo conduci na un aumento di demanda di forsa laboral.

E pregunta central aki ta si e capacidad y/of forsa laboral disponibel riba mercado local, cu actualmente no ta activo, por wordo utilisa cu suficiente eficacia, y si esey ta e caso, cua ta e condicionnan basico cu mester cumpli cune. Si di otro banda uso eficaz di e forsa laboral no activo aki no ta prepara suficientemente pa por atende cu demandanan nobo riba mercado laboral, ki combinacion di instrumentonan di maneho (cursonan di recapacitacion y preparacion di “yiunan di tera” en combinacion cu un maneho di migracion planifica y bon guia por desplega.

Den e cuadro aki, SER ta considerando seriamente e posibilidad di conduci y publica un otro estudio, manera ya menciona, den cua e temanan aki lo ser analisa y cua ta e oportunidadnan y retonan cu por identifica cu tin relevancia pa maneho gubernamental, economia n y mercado laboral, parcialmente cu bista riba formulashon di prinsipionan di maneho pa optimalisá partisipashon riba merkado laboral di Corsou na interes di un crecemento economico ekilibra y duradero.

Ainda tin cu discuti, con, den ki forma y den ki termino di tempo lo inicia cu e estudio. Loke ta significativo, sinembargo, ta e reconocimento cu un estudio di tal indole, realisa pa un organo consultivo di gobierno di parlamento, esta SER, lo por duna un contribucion substancial na realisacion di e obhecionnan manera formula den e programa di gobernacion 2022-2025 di e gabinete aktual cu ta basa pa un gran parti riba e acuerdo di gobernacion di april 2021,  e pakete di pais, cumbini cu Hulanda, y e obhecionnan di desaroyo sostenibel, e asina yama Sustainable Development Goals (SDG’s) di Nacionnan Uni.