Conseho Social Economico, SER, no ta duna un recomendacion pa hisa sueldo minimo, pa awor. Asina e organo a bisa Minister di Labor, Energia y Integracion Glenbert Croes den su conseho riba ahuste interino di sueldo minimo. E conseho ta basa riba un carta di e Minister manda na Juli ultimo, unda e Minister a haci e peticion.

Den e carta, e Minister a bisa cu SER dia 15 di December 2021 a bisa di no ta ta conseha aumento di sueldo minimo dia 1 di Januari 2022, despues cu Minister Croes a haci e peticion pa tal. Minister Glenbert Croes a bisa SER cu a sigui e conseho di December 2021 y no a adapta sueldo minimo. Pero cu pa motibo di aumento di costo di bida pa motibo di efectonan inflatorio causa pa guera di Rusia cu Ukraina, a bisa SER den un carta di 28 di Juli 2022, cu ta considerando un aumento of ahuste interino (tussentijdse aanpassing) di sueldo minimo y a pidi conseho di SER riba esaki. E Minister a argumenta cu circumstancianan a cambia compara cu seis luna prome y mirando e situacion socio-economico y financiero actual, unda aspectonan mundial ta afecta inflacion, manera prijs di combustible debi na e guera na Ucrania, cu su efecto riba poder di compra.

SER di su banda a bisa, cu mirando cu locual e Minister ta pidi ta un aumento of ahuste interino, of provisional, a dicidi pa evalua e peticion basa riba un criteria, esta si aki por papia di circunstancia special, segun articulo 13 inciso 3 di e ley sueldo minimo. E articulo aki ta specifica con por hisa sueldo minimo. Gobierno por trece cambio den e suma di e sueldo minimo basa riba un decreto nacional conteniendo medidanan general (lbham), cu ta rekeri un evaluacion di SER. SER a bisa cu mester a evalua si e argumentonan di Minister ta nifica cu ta mira e peticion di aumento for di e perspectiva cu tin circunstancia special. Den e caso aki, circunstancianan socio-economico/financiero cu por causa un efectonan inflatorio, cu ta nifica perdida di poder di compra.

SER ta de acuerdo cu por papia di perdida di poder di compra, pero no por wak esaki como circunstancia extraordinario na cual e inciso 3 di e ley ta rekeri.

Inflacion lo mester ta cay bao di e inciso 3 cu ta tuma na cuenta e inflacion den e periodo ya menciona y ta keda introduci, si tin un base pa esaki, na e siguiente januari. Segun e Memorie van Toelichting di e ley, esta su splicacion, articulo 13, inciso 3 ta considera circunstancia special of extraordinario den caso cu Gobierno bin cu leynan cu ta mara trahadonan na pago di un prima. Asina lo por aumenta e sueldo minimo pa asina permiti e trahado cumpli cu e pago obligatorio di e prima. SER ta di opinion cu perdida di poder di compra pa motibo di aumento di prijs di combustible como tal no ta cay den e rekisitonan legal pa keda cataloga circunstancia extraordinario.

Sinembargo e organo a informa Minister cu ta bay sigui e desaroyo, netamente pa motibo di e reforma di e structura di belasting, aumento di prijs di awa y coriente, y e efecto inflatorio di esakinan. E conseho recien di SER en todo caso no ta trata un posibel adaptacion di salario minimo na Januari 2023. Pa esey mester di un conseho nobo.