Ayera tardi director di SER (Sociaal Economische Raad), Rudy Geerman a bisa cu nan a wordo invita na gabinete di gobernador pa trece nan opinion of pensamento relaciona cu eleccion general di diabierna ultimo.
Sr. Geerman no a basila pa bisa cu pueblo a papia un palabra cla. “El a duna e dos partidonan mas grandi e cantidad di asiento igual. Consecuentemente e deseo di pueblo ta pa nan dos traha.”
Kiermen e ta haya cu e posibilidad aki mester keda habri. Cu mester por purba di papia cu e dos partidonan (AVP y MEP). Si acaso esey no ta logra, ta nifica cu un di e partido ey lo mester busca un base mas amplio cu ta posibel pa goberna.
El a laga sa cu como SER nan a trece diferente punto dilanti di preocupacion, pero e ta kere cu na su debido tempo nan lo drenta mas den detaye. Ya cu ainda despues di eleccion tin un caminda pa cana, caminda gobernador di Aruba despues di a papia cu tur partidonan y instancianan, e tin e tarea di sondea pa papia cu e informado pa busca e posibilidad di e formacion di un gobierno nobo.
Independiente di e gobierno cu ta bay sinta, sr. Geerman ta haya cu e rol di SER ta keda mesun cos. Esey no lo cambia pasobra cualkier gobierno cu ta bay sinta como prome minister ya cu SER ta cay directamente bou dje por pidi un conseho for di nan. Den e situacion cu SER ta, ya cu nan tin e personal completo aworaki, e trabou ta sigui. “Sea cualkier gobierno cu ta keda. E rol di SER nunca no lo cambia.”
Un punto cu e ta considera relevante ta cu tur gobierno na turno mester respeta y duna mas balor na nan institutonan cu ta duna conseho. “Nan tin un tarea pa haci caminda cu bo ta duna mas balor na bo institutonan.”
El a agrega cu no por nada tur pais den mundo tin e tipo di instituto aki pa den e caso aki nan por duna conseho pa bo tuma un decision miho.
