Wesonan humano di un cueba Bulgaro ta sugeri cu nos especie a yega Europa miles di aña prome cu a kere anteriormente, compartiendo e continente cu e Neanderthals pa hopi mas tempo.
Cientificonan a haya cuatro fragmento di weso y un djente cu test di DNA y radiocarbon detaya ta mustra ta di cuatro Homo sapiens, e mas bieu di cual ta data alrededor di 46mil aña atras, segun dos estudio publica dialuna den journal Nature y Nature Ecology & Evolution.
E fragmentonan di weso humano Europeo mas antiguo anteriormente a ser haya na Romania. Esfuersonan pa data nan a haya problema, pero probablemente tabata alrededor di 40mil aña pasa, segun arkeologo Helen Fewlass di e Max Planck Institute for Evolutionary Anthropology na Alemania, un autor lider di e estudio. E y weso ey tabatin gen di Neanderthal den dje, indicando nan a crusa cu otro alrededor di 200 aña mas trempan, el a bisa.
Investigadonan ta kere cu nos especie a bin di Africa alrededor di 47mil aña pasa durante un periodo breve di kentamento. Esey ta nifica cu pa alrededor di 7mil aña, humano y Neanderthal a biba riba e mesun continente, interactuando un tiki pero probablemente no frecuentemente, segun director di e instituto, Jean-Jacques Hublin, otro autor lider di e estudio. Neanderthals a bay extinto alrededor di 40mil aña atras.
“Nos sa cu ora nan (humano) a yega, tabatin Neanderthals”, Hublin a bisa. “E Danube Valley por tabata un forma pa humanonan moderno – na diferente periodo – move na e parti aki di Europa.” E grupo trempan aki di nos especie probablemente nunca a yega occidente riba e Alps, probablemente apenas algun centenar di hende y por a muri, Hublin a bisa. Europeonan moderno ta descendiente di un segundo ola di humano for di Africa, el a bisa.
A haya e fossiel den cueba Bacho Kiro di Bulgaria, cual ta habri pa cientificonan y publico desde 1930. E cueba ta riba un klif hopi skerpi y ta contene weso di animal, incluyendo rhinoceros y leon, Fewlass a bisa. “Con nan lo drenta e cueba ey riba e klif a menos cu humano a trece parti di e animal, e restonan, den e cueba?” el a bisa.
Tambe tabatin gran cantidad di weso di beer di cueba. E Europeonan antiguo aki a traha pendiente di weso di beer di cueba, no otro animalnan, mustrando un afinidad pa e animal aki, Hublin a bisa. El a teoretisa cu e descubrimento ta indica cu Neanderthal, ken te e periodo di tempo aki no a mustra habilidad pa traha joyeria, a siña traha pendiente di nos especie.
E estudio ta ‘duna un argumento convincente y fuertemente ta reforsa e hypothesis cu humanonan moderno a dispersa den Europa prome cu 45mil aña pasa for di Asia occidental”, segun Katerina Harvati, paleoantropologo na Universidad di Tuebingen, kende no tabata parti di e estudio. Harvati ta di acuerdo cu Hublin, cu esaki ta haci probabel cu joyeria Neanderthal haya den Europa occidental tabata algo cu e especie ey di algun forma a siña for di humano. Otro expertonan, elogiando e datacion di e wesonan, a bisa cu esey tabata un salto teorico cual nan no tabata haya asina convincente.
