Pa SER, e enfoke di e conseho riba seguridad di cuminda ta basa riba tres punto di salida, disponibilidad, accesibilidad y stabilidad di cuminda. Esta, cuanto cuminda di bon calidad tin a base di propio produccion of importacion; si tur hende tin medionan pa por haya acceso na cuminda adecuado; y cu acceso na cuminda no por keda menasa pa un crisis inespera, sea ta climatologico, economico of di salud.

Esaki ta den e rapport cu e Conseho Social Economico a produci riba seguridad di cuminda na Aruba. SER a papia cu tur actor envolvi, cu ta Santa Rosa, productornan local, Savaneta Farm Supply, Centro di Pesca Hadicurari y Servicio Veterinario.

Santa Rosa y registro

Durante e combersacion cu Santa Rosa, responsabel pa desaroyo di maneho y promocion di agricultura, cria y pesca, a saca afo cu tin un necesidad pa registracion di actividad di cultivo, cria y pesca ademas di productornan, sea cu ta amateur of profesional. Casi no tin dato riba e actividadnan, mirando cu un gran parti di e actividad ta sucede den e area informal. Door di e shelter in place na comienso di maart y april, algun productor a inscribi nan mes pa por continua cu nan actividad. E momento ey por a haya bista riba 504 productor local (agricultura, cria y pesca), pero no a duna un bon bista di e cantidad y tipo di produccion.

Enseñansa, informacion, guia

Tin un necesidad pa informacion y curso riba agri-horti-hydro cultura. Pero Santa Rosa no tin e capacidad, entre otro personal y medio financiero, pa duna e cursonan aki. Santa Rosa ta considera importante cu e sistema di enseñansa di SPO y EPB mester amplia e curiculo pa amplia conocemento di naturalesa y agricultura, pa duna mas posibilidad di futuro, tanto trabao como proyecto na cas.

Santa Rosa tambe kier publica un buki di guia, organisa cursonan practico entre otro pa yuda agricultornan prepara un plan di empresa y con pa yega na subsidio, ademas di lanta un centro di conocemento pa agricultura sostenibel.

Guia y sosten ta crucial pa comunidad por hiba un bon estilo di bida y logra haya experiencia di trabao den agricultura, y permiti agricultornan y criadonan haya mas medio, manera awa, tereno y cuminda pa animal.

Tambe Santa Rosa kier promove comercio y empresaria den e sector, incluso stimula cooperativanan.

Acceso pa huurgrond pa agricultura y cria

Santa Rosa a indica cu no tin un registracion actualisa di tereno di huur cu ta destina pa agricultura y cria na Direccion di Infrastructura y Planificacion, DIP. Un registracion asina ta importante pa haya bista di entre otro e grandura cu ta adecuado pa plantacion of cria. Por logra esaki a base di un analisis di e tera. SER a compronde cu DIP a inicia cu e registracion menciona.

Falta di registracion

Aruba falta un sistema di certificacion manera ‘Good Agricultural Practices’ GAP. Esaki ta uno cu ta internacionalmente recomenda y ta un certificacion di proceduranan pa produccion y procesamento usando metodonan duradero. Un certificacion asina ta promove y mantene un calidad halto di produccion na interes di salud publico.

Irigacion pa proyectonan di agricultura y cria

E falta di irigacion y costo halto di awa ta stroba un desaroyo consistente den e sector agrario. Na juni 2020, Gobierno den colaboracion cu WEB a dicidi pa baha prijs di awa pa esnan registra na Santa Rosa, di 9.50 florin pa 5.50 florin pa meter cubico di awa. Ademas, Santa Rosa ta bende awa di dam na 3.50 florin pa 13 meter cubico. Pero esaki no ta posibel den temporada seco. Santa Rosa a inverti den un sistema adicional na e planta di purificacion na Parkietenbos pa haci uso di e awa aki, pero lamentablemente no por usa esaki pa plantacion, ya cu e ta rekeri un control diario. DVG ta controla, pero pasobra e resultadonan ta tarda 24 ora, no por garantisa calidad di e awa. SER ta kere cu si kier promove irigacion pa plantacion, mester busca na un tecnica di purificacion cu ta barata y continuo.

Productornan agrario na Aruba

SER a hiba combersacionnan cu diferente productor local comercial, entre nan e participantenan na e Cooperativa Agricola Aruba, Goshen, Local Pride Farms Aruba, Cunucu Fresh, Happyponics, 297 Farm y United Farms Aruba.

Locual a sali afo ta e retonan y estorbonan cu por hunga un rol si kier stimula produccion propio na Aruba. Esakinan ta e costo halto di energia pa productornan agricultor local, particularmente si ta usa tecnologia nobo manera hydroponics y aguaponics; e clima seco y falta di irigacion ta haci cu e costo di awa ta keda halto; costo halto di material necesario, manera tera, simia, fertilizer, invernaderonan, empacamento, ademas di e aparatura mes pa iriga.

Locual e companianan a ilustra cu mester por bin cambio rapido ta e burocracia cu ta stroba e realisacion di iniciativanan agricola local, mientras cu falta un maneho efectivo riba e tereno aki.

Mescos cu Santa Rosa, e productornan local a mustra cu no tin suficiente conocemento riba tecnologia di agricultura moderno y e traspaso di conocemento riba e desaroyo tecnologico. Tin poco of ningun acceso na financiamento pa cumpra tecnologianan nobo y proyectonan similar. Finalmente, tin un escasez na tereno pa produccion agrario (red. Bon Dia Aruba a compronde di un economista cu e forma mas facil pa yuda den financiamento di proyectonan, ta si Gobierno cambia su maneho y en bes di duna tereno di huur pa agricultura, converti esaki den erfpacht pa facilita e proceso di financiamento).

Banda di e productornan agrario local cu ta activo comercialmente, SER a tuma nota cu tin mas y mas ciudadano cu ta produci nan propio fruta y berdura. Pero, pa motibo cu no tin data, a laga e grupo aki fuera di e analisis grandi aki.

Producto agrario local compara cu importacion

SER a haci un comparacion entre productonan agrario importa y esnan produci localmente. Segun cifranan di Buro Central di Estadistica, CBS, Aruba a importa 109 miyon florin na fruta y berdura pa 2019 di tur e productonan importa na un balor di 600 miyon florin. E cifranan aki ta duna un bista cla cuanto ta gasta pa importa fruta y berdura pa Aruba.

Segun un presentacion di Cooperativa Agricola Aruba, e entrada conhunto den e sector di berdura y fruta local tabata di 845 mil florin. Den comparacion cu locual a importa na e productonan aki, e ta representa 0.8 porciento di e prijs total.

Mester bisa cu prome cu COVID-19, e sector local di agricultura tabata contribui menos cu 0.5 porciento na e Producto Bruto Nacional di Aruba. Esaki ta inclui pesca y cria di bestia.

Cria di bestia

E contribucion di cria pa seguridad di cuminda na Aruba y tambe como un actividad economico ta hopi abao. Asina SER ta sigui bisa den su rapport riba Seguridad di Cuminda. Falta di registro y data ta dificulta SER pa bin cu datonan concreto, pero e ta un realidad si cu e contribucion ta minimo.

Mirando cu Aruba kier bay den direccion di ampliacion di sector primario como un parti importante di economia y pa elimina e dependencia grandi riba importacion, mester pone atencion na cria di bestia. Pero, pa por determina con mester aumenta productividad den e sector aki, mester di mas investigacion, segun SER.

Servicio Veterinario, banda di e control riba carni importa, ta ehecuta inspeccion na carnicerianan cu tin permiso. Durante 2019, a bishita diferente carniceria, pa un total di 72 biaha. Banda di esey, e servicio ta maneha Abattoir y conforme ley ta controla animalnan prome y despues cu mata nan pa consumo. Pero, e carni local ta forma menos di 1 porciento di locual ta consumi na carni, cu ta mustra con grandi e importacion ta. Mayoria animal di cria cu a pasa abattoir na 2019 tabata porco, sigui pa carne y cabrito y finalmente baca.

Pesca

Pesca na Aruba por keda reparti den tres diferente categoria, esta industrial, artesanal y recreativo. E meta principal pa pesca industrial y artesanal ta benta di pisca, mientras cu e obhetivo di pesca recreativo ta e entretenimento. Local y turista ta participa hopi den e ultimo.

Investigacion a mustra cu 26 porciento di henter e populacion di Aruba ta pisca por lo menos un biaha pa aña. E cantidad di piscadonan di ocasion y part-time a aumenta grandemente entre 2010 y 2014, mientras cu e piscadonan profesional a keda riba e mesun liña. E ultimo grupo aki ta pasa mayoria tempo cu pesca of ta ricibi 90 porciento of mas di entrada for di benta di nan piscamento. Pa esnan cu ta haci esaki den oranan liber, e porcentahe ta entre 30 y 90 porciento, y pa esnan cu ocasionalmente ta pisca, e ta nifica cu nan ta gasta maximalmente un tercera parti di nan tempo ta pisca of ta suplementa nan entrada cu maximo 30 porciento danki na piscamento.

E datonan aki, SER a acumula di Centro di Pesca Hadicurari.

Potret: Santa Rosa.