E conseho social economico SER a confirma locual Bon Dia Aruba ya a publica riba 10 di augustus: e aumento di salario minimo entrante 1 di augustus no a bay segun ley. Esaki pasobra gobierno no a scucha e Conseho prome.

Ayera SER a manda un comunicado pa prensa unda nan ta splica cu nan a informa minister di Labor y gobernador tambe tocante e situacion ‘mirando cu esaki ta causante di preocupacion y incertidumbre grandi den nos comunidad’.

Pa motibo cu gobierno no a scucha SER prome, nan tin duda tambe ‘ariba e sostenibilidad di esaki’.

Aparentemente gobierno ni a informa e organo pasobra den nan relato nan ta bisa tambe: “Via e medionan di comunicacion Sociaal Ecocomische Raad (SER) a tuma nota di e decision di gobierno di Aruba pa aumenta e salario minimo entrante 1 di augustus 2017.  Pa verifica locual a sali den medionan di comunicacion SER a bay sondea e documentonan oficial cu ta haci  aumento aki posibel cual a resulta di ta e Landsbesluit, houdende algemene maatregelen di 21 di juli (AB 1989 no. GT 26) (tussentijdse aanpassingen augustus 2017) y tambe e corespondiente Nota van Toelichting.

Despues di a studia e dos documentonan aki,  SER tin cu remarca cu e proceso aki no a cana segun ta stipula den ley.”

No por segun ley
Manera nos a splica den nos editorial tambe den e edicion di 10 augustus, segun ley gobierno mester pidi conseho adelanta (articulo 13 di Landsverordening Minimumlonen) “Den e caso  aki no a drenta ningun peticion pa conseho na SER di minister di Labor tocante un ahustacion/aumento di e salario minimo entrante 1 di augustus 2017”, asina e Conseho ta bisa.

Bon Dia tambe a puntra bista di minister Richard Arends di Asuntonan Economico cu a bisa nos cu gobierno no a actua contra ley. Como cu ta trata di e peticion haci na december cu nan a haci pa drenta na vigor na januari 2017. Na e momento ey nan a pidi SER pa un conseho. E problema ta cu e cambio di ley a tarda den e proceso legislativo, e ta bisa, p’esey e aumento a tuma luga na augustus en bes di januari. Pero e ta trata di e mesun peticion, segun e minister.

Sinembargo SER ta bisa awor: “Den e Nota van Toelichting di e Landsbesluit caminda e ahustacion/aumento di e salario minimo a wordo regla, gobierno ta menciona cu SER a wordu scucha pa medio di e SER-advies Aanpassing van het minimumloon per 1 januari 2017 di 2 december 2016. Sinembargo esaki no ta corecto pasobra den e conseho menciona, SER a duna minister di Labor un conseho ariba un posibel ahustacion/aumento di salario minimo specificamente y exclusivamente  entrante 1 di januari 2017.”

Conseho negativo
Banda di esaki nan ta enfatisa cu nan a duna un conseho negativo despues di haci nan investigacion y analisis di ‘e desaroyo y expectativa di (crecemento) economico relevante na y pa Aruba’. “Por lo pronto SER ta mantene su posicion inicial encuanto e ahustacion/aumento di salario minimo tanten cu e no ricibi un peticion oficial di Minister di Labor. Si esaki sosode SER lo duna un conseho basa ariba e situacion social economico actual”, e Conseho ta declara.