Sindicato SEPPA y SIMAR a manda un carta pa gobierno, fecha dia 17 di april ultimo, unda nan ta reacciona riba e plan cu gobierno a presenta na e sindicatonan pa trata di haya nan apoyo pa e plan di austerisacion aki, cu ta encera reduccion di salario y di e compensacionnan separa cu e empleado publico y otronan den igual posicion ta haya.
Pa cuminsa e sindicatonan ta expresa e opinion cu e reunion a keda yama pa “informa” nan di e plan di gobierno y ta haya cu esaki no ta forma pa atende asunto di trahador. Tampoco esaki ta un ehemplo na otro dunadornan di trabao, y ta añadi cu aki gobierno ta mustra su cara berdadero. E sindicatonan ta reitera cu nan tin comprension pa e situacion cu Aruba ta aden y cu nan ta dispuesto pa bay den discusion pa mira con partidonan por yega na acuerdo. Sin embargo, nan no ta aprecia cu ta impone riba nan.
Tambe e dos sindicatonan ta reacciona riba e comentarionan cu no a tarda pa sali, cu “e aparato ta mucho grandi, empleadonan publico tin salarionan halto, sumanan astronomico tabata skeiro tur caminda.” E sindicatonan ta lamenta cu “politiconan anti trahador a haya forza, nos leynan laboral ta parce di a perde tur balor ya cu e trahador diripiente ta enfrentando un ‘wild wild west’ na unda ya no tin regla.” Tambe ta observa cu gobierno tin responsabilidad pa su ciudadanonan como tambe pa otro dunador di trabao cu tin nan trahadornan pa carga.
Ta lamenta cu gobierno a duna oportunidad na dunadornan di trabao, apenas cu gobierno a anuncia e Afl. 950 cu ta duna e desempleado, pa “probecha di e buraco” y keda sin paga nan empleadonan desde luna di maart caba, segun e sindicatonan, cu ta califica esaki como un “sinberguenseria”.
E sindicatonan, despues di a scucha su miembronan, ta yega na un lista di recomendacion, cu ta encera entre otro: yama e ministronan plenipotenciario back for di Washington y Hulanda; baha e cantidad di ministro cu sigur 2; elimina gastonan di representacion di politico (ministro, parlamentario). Tambe baha e cantidad di coordinador pa cada ministerio y aplica e principio di ‘Last in, first out’ pa esnan den servicio di e despachonan di ministro, entre nan varios ex-mandatario cu pension grandi caba. Ademas ta recomenda termina contract di huur innecesario, igualmente contract di lease innecesario. E sindicatonan ta mustra tambe cu e companianan di lease mester ta solidario y termina e contractnan sin gasto pa gobierno. Laga gobernantenan usa nan propio medio di transporte,mescos e trahador humilde.”
Ta propone ademas pa baha salario di politiconan cu 20%, argumentando cu nan mester duna e ehemplo. Ademas ta propone pa haci tur e comisariato (na empresanan estatal) un posicion honorario, sin compensacion financiero. “E mester ta un honor si bo experiencia y experticio ta considera di valor pa conseha e instancianan aki.”
Den e cuadro aki ta propone tambe pa introduci e asina yama ‘Balkenende-norm’ pa e funcionnan den empresa y entidadnan estatal unda segun e sindicatonan tin varios “cu ta gana mas di 25 mil florin pa luna mientras cu salario di ministro ta 15.000 pa luna.” E norma Hulandes yama na ex-premier Balkenende ta stipula cu ningun hende den sector publico ta gana mas cu ministro. Cu e reduccion di salario di ministro esaki lo bira Afl. 12.000 pa luna y e sindicatonan ta haya cu nan tur mester baha na e suma ey.
Finalmente, ta propone tambe pa corta tur biahamento, baha gasto di abogado y consehero, elimina ‘overbruggingstoelage’ pa ex-gobernante y parlamentario y para totalmente huur di aparato y equipo. Tambe elimina tur celebracion ya cu e sindicatonan ta haya cu ta tempo di crisis y no tin nada di celebra. Tambe cu mester suspende tur compra y servicio di computer, equipo y servicionan di telefon. Limita uso di celular y hacie disponible solamente unda ta estrictamente necesario pa emergencia y funcionamento di servicio.
Tambe ta pidi pa por haya, den cuadro di transparencia, e gastonan total di gobierno pa cada seccion di gasto pa 2020, “pa asina por sigui cu e discusion riba medida,” e sindiactonan ta conclui.
