Tin un discusion entre minister di enseñansa y sindicato SEPPA riba e posicion huridico di un grupo di docente y trahado di DPS. Nan si ta ambtenaar al contrario locual e minister ta bisa, segun e sindicato.

 Directiva di SEPPA pa medio di su secretario general, Magaly Maduro, ta aclaria cu prome cu aña 2009, scolnan publico tabata wordo maneha pa Contact Bureau Openbaar Onderwijs, un seccion di Departamento di Enseñansa. E tempo ey caba tabatin discusionnan na unda a base di conseho a independisa e maneho di scolnan publico den un departamento di gobierno cu su mesun diensthoofd, los di Departamento di Enseñansa.

Den e caso aki bo ta haya docentenan y otro grupo di trahadonan cu tin un Landsbesluit den nan man, ya cu prome cu a independisa maneho di scolnan publico for di Departamento di Enseñansa, ya nan tabata traha pa un of otro afdeling bao di Departamento di Enseñansa y nan a wordo nombra ambtenaar. Di e forma aki SEPPA ta aclaria e posicion huridico di e docentenan di scol publico cu gobierno actual kier independisa y bira un fundacion.

 DPS un fundacion
Den reunion cu minister Rudy Lampe (RED), SEPPA a ricibi informacion cu den punto 1 di programa di gobernacion, e gobierno actual  lo kier  introduci un sistema di calidad den enseñanza  y den cuadro di esaki lo cambia leynan pa  fundacionnan por funciona a base di good governance principles.

Segun minister Lampe, na e momentonan aki gobierno no tin autoridad riba e otro fundacionnan (SMOA, SKOA, SPCOA) y pa e motibo aki kier bin cu un model fundacion cu mester ta e ehempel pa otro fundacionnan. E speransa di minister ta cu nan lo cuminsa funciona mescos cu e fundacion nobo.

Loke ta hala atencion di SEPPA ta, cu no ta wordo bisa den e programa di gobernacion cu ta e maneho di scolnan publico mester wordo independisa. Sino ta papia di hisa calidad di enseñanza y funcionamento a base di good governance principles. “Principionan cu sigur tur hende mester por ta di acuerdo cu nan, pero esakinan mester bin for di ariba bin abao”, e sindicato ta bisa.

Pero pa e minister na e momento aki e unico solucion cu ta mira ta, pa hisa e calidad di nos enseñanza ta pa aparentemente independisa DPS y haci un fundacion.

Segun minister asina e ta logra haci enseñanza independiente di politica, y den tur conferencianan di prensa, entrevista esaki ta keda menciona. Sinembargo e punto aki no ta keda specifica kico lo kiermen cu saca politica for di scol publico. SEPPA ta señala cu minister di enseñanza ta un politico activo y aworaki nan loke su expresion ta haci ta crea duda. Of nan ta interpreta cu tin politico den servicio. Mientras cu e politico mes ta na e nivel di ‘bevoegd gezag’. Na final, pais Aruba ta keda responsabel pa enseñanza publico.

No tin otro conclusion -segun SEPPA- cu loke e minister of gobierno ta ‘purbando ta di schuif’ su responsabilidad como gobernante riba e directiva completamente nobo di e fundacion cu e lo lanta. E cuestion ta si e ta asina simpel si of no, manera ta wordo papia simplemente haciendo di DPS un Fundacion.

Posicion huridico
E pensamento di minister ta pa tur hende bay over, esunnan cu ta docente, pero tambe esunnan cu no ta docente. Mas ainda di acuerdo cu e minister, e trahadonan aki bao di DPS no ta ambtenaar.  SEPPA tin otro opinion cu e minister riba e asunto aki.

Pa loke ta e posicion huridico, SEPPA a mustra minister cu tin trahadonan bao di DPS cu tin nan Landsbesluit, pues ta nombra como ambtenaar (empleado publico). Pues automaticamente LMA ta conta pa nan. Manera ya indica hopi di esunnan cu tin un Landsbesluit tambe tabata cay bao di un of otro departamento di gobierno prome cu a pasa bao di DPS.

Kiermen, bisando cu e nombramento di personal cu no ta duna les via Landsbesluit ‘como fout’, no ta corecto segun SEPPA. Esaki no ta cuadra, mirando cu DPO tawata traha Landsbesluit pa persona cu no ta duna les y Departamento di Enseñansa, decreto ministerial pa docentenan hasta prome cu 2009 ora DPS a independisa di Departamento di Enseñansa.

Kiermen semper a nombra e trahadonan aki via decreto ministerial como ambtenaar y LMA (ley) semper nan a aplica pa nan, segun e sindicato. “Semper nan a trata e trahadonan como ambtenaar, y tur reglanan vigente pa e ambtenaar nan ta aplica riba nan relacion di trabao.” Tambe pa e sindicato ta incorecto e cuenta ey di cada rato menciona onderwijsambtenaar y ta zona mescos cu tin distincion entre ambtenaar. “Esaki ta leu di ta e berdad, ambtenaar ta keda ambtenaar.”

Derecho pa dicidi
Pa SEPPA e trahadonan cu ta cay bao di DPS mester haya e derecho pa prome dicidi si nan kier bay over den e fundacion si of no. “Y no manera ta purba di haci, esta automaticamente tur hende mester bay over. Pa esaki minister mester negocia hunto cu sindicato un plan social, unda ta regla e derecho di tur hende cu si ta desea di bay over den e fundacion, pero tambe pa esunnan cu no ta desea di bay over. Mescos ta importante con e statuut mes di e fundacion nobo aki ta hinca den otro.”

SEPPA ta haya cu tin otro cos cu ta merece atencion. “Ta conoci, e kehonan di semper, di falta di material pa por funciona manera mester ta, pa e insiguridad na pia di trabao, pa klasnan cu cantidad grandi di mucha, pa falta di decisionnan concreto y efectivo, etc.. Pero tambe pa e hecho cu e muchanan di awendia no ta mescos cu antes, y hasta tin cu confronta otro tipo di situacionnan cu muchanan cu ta merita atencion di otro tipo di profesionalnan.”

“Ta parce cu no ta suficiente cu e docentenan y esunnan cu no ta docente ta labora den un ambiente no mucho agradabel pa awor nan ta haya nan mes obliga di bay den un otro forma di trabao. E trahado ey nunca lo por ta motiva.”

Medezeggenschap
Minister tambe kier introduci un tipo di  plataforma di participacion  yama ‘medezeggenschap di docentenan y mayornan’. E sistema aki ta uno di hopi tempo, conoci na entre otro pais Hulanda, pero tambe na Merca.

“Semper participacion di esunnan envolvi ta importante y ta aplaudi! Den e caso aki e ta zona bunita, sinembargo e por bay un direccion no desea tambe. Ta p’esey mes, e reglanan di wega mester ta bon conoci pa asina tur hende sa tambe con pa proteha su mes”, segun e sindicato.

SEEPA ta bisa cu nan ta bay na mesa cu minister bek pa sigui atende cu segun nan ‘preocupacionnan’ cu tin bao di trahadonan cu ta cay bao di DPS, sigur riba e asunto aki di independisacion di DPS.