Ainda e trahadonan di Bureau Centro Multidisciplinario (MdC) ta malcontento pa e falta di solucion na nan preocupacion. Ayera e trahadonan a bolbe bay Bestuurskantoor y Minister Presidente Evelyn Wever-Croes a priminti di reuni cu nan diabierna awor.

Sinembargo SEPPA y e trahadonan di MdC ta lamenta cu ainda no a bin cu solucionnan fiho pa tur punto den e manifiesto cu a entrega riba 19 di juni 2019 na Minister President Wever-Croes.

SEPPA a informa cu a wordo palabra cu lo trata e preocupacionnan di Bureau Centro Multidisciplinario den Conseho di Minister y cu despues lo wordo informa pa Minister President of Vice Premier.

Sinembargo nan no a haya reaccion concreto encuanto esaki. Parlamento di Aruba tambe a ricibi e manifiesto riba 19 di juni 2019, y ainda e centro aki ta warda riba un reaccion di parti di Parlamento di Aruba.

Minister Lampe a haya e tarea for di Minister President pa dialoga cu SEPPA y e trahadonan di CdC. Mientras esaki no tabata e palabracion entre Minister President y Vice Premier, e sindicato a indica cu toch nan tabata dispuesto pa scucha Minister Lampe. A pesar di e hecho cu cerca trahadonan no tin confianza den e minister aki. Tampoco no tin confianza cu lo yega na solucion cu e Minister di Enseñanza actual.

E combersacion segun e sindicato no tabata un dialogo y no a yega na otro. Nan ta señala cu Minister Lampe ta keda mantene su puntonan sin argumentonan bon funda; y ainda no tin claridad tocante e continuacion di e departamento Centro di Observacion (Observatiecentrum) y Teacher Care.

Minister Lampe no ta wak posibilidad pa fortifica e departamento Centro di Experticio (Expertisecentrum), unda tin lista di espera pa atende cliente. Mientras el a aproba pa personal di Centro Multidisciplinario bay ter beschikking otro caminda. Pa e sindicato y e trahadonan esaki ta contradictorio.

Contradiccion tras contradiccion
Banda di esey Minister Lampe a vocifera cu ta bin cu un Comision Nacional di Indicacion (Nationale Indicatiecommissie) cu ta controla, a base di criterio stipula, consehonan duna tocante ki tipo di enseñansa ta adecua pa un alumno haya.

SEPPA ta haya cu e comision nacional di indicacion aki lo bay haci un tarea cu Centro Multidisciplinario ta haciendo caba, y pa bin cu un comision asina acerca ta innecesario.

No a involucra profesionalnan di Centro Multidisciplinario den e proceso aki tampoco. Mientras e profesionalnan tin e experticio y experiencia, y pa mas cu 30 aña ta carga e tarea di indicacion pa enseñansa special y tin un control interno caba.

Si tin puntonan pa traha riba dje mes –segun SEPPA- tin otro manera pa atende e puntonan aki, entre otro involucra e profesionalnan mes cu tin e tarea aki y pa no bin cu cambio y decisionnan a base di solamente 1 opinion. Ta bisa cu tin paro di personal y no tin placa pa por fortalece e centro aki. Pues unda gobierno ta bay saca fondo pa e comision esaki? Esaki atrobe ta contradictorio.

Tin mayornan pendiente pa haya contesta kico lo pasa cu futuro di nan yiunan. Mayornan, maestronan y scolnan ta den espera pa haya claridad mescos cu e trahadonan di MdC encuanto continuacion di nan servicio. Cu preocupacion e sindicato ta trece dilanti cu den algun dia e aña escolar nobo ta cuminsa y no tin claridad. SEPPA lamenta cu despues di tur esfuerso ainda e situacion ta igual.