Awe riba Dia Internacional di Enfermeria, sindicato SEPPA ta trece su reflexion riba diferente aspecto cu tin di haber cu e proteccion social manera un pensioen digno y un bon posicion di e trahadonan cu ta labora riba cadena di dunamento di cuido di salud. Tambe nan conexion cu maneho di salud publico riba nos isla.

Tur hende a yega di wordo atendi den un of otro forma pa un profesional riba e tereno di cuido di salud. Nos por kere cu e tarea di un enfermera of enfermero ta di solamente pone un remedi, coy un pulso, busca un ader y un cantidad di cos mas.

Berdad, nan dia di trabao por ta consisti di esaki pero e ta mucho mas cos. Ta di duna animo na pashentnan, famia, duna confianza, etc. Esaki solamente ta posibel na e vocacion cu e profesionalnan aki ta sinti pa nan trabao. Pero henter e sistema di salud ariba su mes ta depende di varios aspecto.

E prome aspecto ta e hecho cu nos ta depende di e servicio di nos seguro general AZV, bao cual nos salubridad publico ta hinca. Y akinan no ta falta e cantidad grandi di criticanan y hopi conoci riba e tardanza pa reaccion y atencion di dokter of specialistanan. E sistema cu nos hendenan ta wordo atendi cual mayoria biaha ta wordo gestempel di ta uno no adecua, etc..

Un otro aspecto ta e asunto di cuanto e sistema aki ta costa nos comunidad. Mas ainda esunnan cu ta paga e prima esta e dunado di trabao y e trahado !. Pues loke ta costa e trahado pa asina e servicio aki ta posibel na tur nos ciudadanonan, ta un peso enorme pa e cartera di e trahado.

Y e otro aspecto ta e realidad mahos cu esunnan cu ta labora den e mundo di enfermeria, no ta esunnan miho paga, tin cu lucha constante pa atencion y hasta pa tin material adecua pa por funciona. Un asunto hopi importante ta con nan final di carera ta regla, esta ora nan bay p.e. cu pensioen!! Un aspecto hopi importante pa tur trahado na Aruba.

Areglo di pension
Nos por corda con un par di aña atras a inicia cu un areglo di pensioen general, y lamentablemente esaki a keda te eynan tambe. Mas tristo ta tambe cu e mayoria di esunnan den enfermeria ta e areglo di pensioen aki so nan tin como beneficio. Awor ta e mesun grupo di trahadonan aki ta depende tambe di nos sistema di salud pa por mira posibel adelanto of mehoracion den nan condicionnan di trabao.

Hopi biaha e prome pregunta cu ta bin dilanti ta, con ta haci esaki si no tin fondo suficiente? Pues cada biaha e punto di fondo ta bini dilanti y asina nunca e tema di percura pa un bon areglo di pensioen pa esunnan den enfermeria no ta haya prioridad. Y ora nos ta papia di un bon areglo di pensioen, nos no ta papiando di un seguro, nos no ta papia mas di un porcentahe minimo of abao manera e ta na e momentonan aki.

Nos ta papia di un areglo bao di cual mañan e trahado por bay cas descansa trankilamente, bay cas sin niun preocupacion cu si e lo tin un entrada digno pa por sobrevivi !.

P’esey mes tur ideanan pa pasa p.e. SABA bao di AZV, na unda ta a base di lucha di SEPPA hunto cu e trahadonan aki a yega na e beneficionan cu awe nan ta gosa di dje, ta ideanan hopi peligroso y trahadonan mester ta hopi alerta pa no perde.

Trahadonan di SABA ta e unico fundacion social subsidia pa gobierno cu ta cay bao di e areglo di APFA. Esaki tabata un lucha largo !! SEPPA ta sigui kere cu ta importante pa inverti den e profesion di enfermeria cu ta esencial pa e crecemento economico y e logro di atencion universal na salud. Nos ta papiando di trahadonan cu na ora di trata un pashent tin acceso na un imagen completo y hunto cu un curriculum di educacion exigente ta converti e trahadonan den un posicion unico y di liderazgo ora di trata asunto di salud di un pais.

P’esey ta momento pa trata e posicion di tur esunnan den enfermeria y duna e balor mereci. Tin hopi cos pa mehora y den tur e trayecto mester scucha e bos di esunnan cu ta labora den e mundo aki.

Na ocasion di e conmemoracion di e Dia di Enfermeria pa esunnan cu ta traha den e sector aki e sindicato aki ta felicita tur trahado den e ramo, principalmente e miembronan di SEPPA. No ta tur ora ta mira e importancia y balor di e trabao cu ta keda desplega ta haya balor, sin duda algun boso merece hopi mas.