ORANJESTAD – Den cuadro di Dia Mundial di Obrero, secretario general di sindicato SEPPA, Magaly Brito ta trece dilanti den nomber di nan directiva na manera di reflexion. Mañan 1 di mei nos ta yega e 133 aña di e lucha di e martirnan di Chicago. Un lucha unda lidernan sindical a ofrece nan bida pa conkista derecho di trabao di 8 ora, demostrando forsa y grandeza.

Mientras cu cada biaha ta keda recorda e lucha aki, e ta mas cu obvio cu e dia aki cada dia mas ta wordo lubida. Hunto cu e hecho importante aki, nos ta celebra e di 100 aña di ILO – International Labour Organisation tambe. E aña aki nos ta mira preparacionnan grandi tambe pa e celebracion aki.

SEPPA ta indica cu mundo henter ta recorda e dia aki, dunando muestra di gradicimento na tur esunnan cu a hiba e lucha aki. Nos ta recorda y reflexiona cu hopi alegria cada logro cu ta faborece derecho di trahadonan. Hopi trahado no sa of nan a lubida sucesonan di un dia manera 1 mei 1886, unda infiltrantenan den seno di trahadonan cu nan calumnianan y redashinan contra lidernan sindical, a crea prome un confusion y despues desorden, pa habri caminda pa e forsanan policial den un forma brutal drenta den un reunion di trahadonan, pa kibra reunion, bati y/o maltrata, pa despues mata lidernan sindical y trahadonan den e lucha.

Esaki simplemente pa e lucha cu tabata ser hiba, esta e lidernan sindical y trahadonan solamente tabata kier un orario di trabao di 8 ora pa dia.

E provocacion a causa un confusion enorme, y trahadonan tabata core tur caminda buscando forma pa scapa nan bida, pasobra polisnan tabata tira manera loco. Y e instigadonan cu un momento a haci comosifuera nan tabata compañero di e lucha, tabata para un banda ta wak e masacre tuma luga. Ta hopi hende a wordo mata na e plasa Haymarket na Chicago.

Insiguridad di trahadonan
Segun secretario general di SEPPA, den e ultimo añanan ta hopi cambio a bin ta tumando luga, na final di dia e aspecto di placa ta gara mas interes.

Asina nos ta haya e cantidad di excuus ‘no tin placa, p’esey no por duna’, ‘pa falta di fondo, mester trece cambio.’ Pero tambe e trahado cu ta enfrentando e bida cotidiano cu hopi insiguridad ta pone e aspecto placa na prome luga den su negociacionnan. Algun ta prefera di culpa sindicatonan pa ‘no por logra suficiente,’ desconociendo di forma total e pensamento di e trahado cu na final ta tuma e decision y e rumbo di negociacionnan.

E insiguridad, desconfianza cu tin pa con situacion lo ta den futuro ta basta preocupante bao di trahadonan. Situacion na Aruba pa e clase trahado ta keda dificil. Ta un constante lucha pa logra apenas algun beneficionan aki aya pa e trahado. Ta parce cu ainda e situacion economico na nivel mundial ta manera un spirito rond di e clase trahado. E situacion aki ta uno basta hostil. Rond mundo, nos ta mira con desempleo ta crece, y aki na Aruba ta cuanto ta e trahadonan cu a perde trabao. Ta hopi trahado tin cu no tin trabao drechi, y tampoco ta gosa di beneficionan laboral drechi. Apenas un salario minimo nada mas !!.

Pero igualmente nos ta mira con na pia di trabao tin hopi violencia ta tumando luga. No ta pornada nos ta haya cu un comision di docentenan preocupa ta lanta para y mustra riba e violencia cu ta pasa cu nan. Kico nan mester soporta, pero mas ainda, e insiguridad na pia di trabao reinando, e falta di reconocemento y e balor pa nan trabao, mustrando mas ainda cu den enseñanza ta parce cu tur cos por wordo haci contra docente y nada ta wordo haci, no tin sancion contra agresornan mes !!. Pa SEPPA, e grupo aki di docentenan preocupa cu a lanta mas bien mester wordo mira como intentonan pa reenforsa e bos di sindicatonan, y enfatisa cada biaha loke ta nan realidad na pia di trabao.