Sindicato SEPPA a referi riba un supuesto encuesta cu a wordo haci pa midi opinion publico su posicion riba Hulanda su control total di nos pais. Pero e sindicato ta lamenta cu tin hende cu ta na fabor, sin sa e historia di e construccion di pais Aruba, desde su Status Aparte te na unda nos ta awe.

Aunke e tipo di encuesta aki por a mustra cu hopi hende ta fada y cansa di e mesun cosnan robes debi na e actuacion di politiconan cu ta mustra cu interes personal of di partido ta riba interes di un pueblo. Esakinan ta haci awe cu no tin confianza, cu ta prefera un control di otronan, segun SEPPA.

Pero di otro banda e sindicato ta señala, unda e siguransa ta cu realmente esaki ta e solucion? Pakico e desconfianza den ‘politiconan’ ta wordo generalisa den tal extremo cu ya awe Aruba no ta dispone di ningun hende mes cu si por goberna y guia nos pais drechi?

Nos mester para keto un rato y pensa bon kico realmente nos kier, puntrando nos mes si realmente nos mes no tin hendenan capaz pa haci bon. Nos no por scapa for di e hecho cu nos mester carga e responsabilidad pa fayo di nos politiconan of esnan cu a goberna nos pais, lastima ta asina e ta, segun SEPPA.

Pero pa SEPPA esaki no ta nifica si cu luchanan grandi mester wordo tira afo pa motibo di escogencianan robes. Of hendenan cu no por a haci drechi, simplemente paso e no tin’e den dje. Nan ta haya cu tuma decision asina grandi, sin informacion debido, sin sa e contenido de fondo di e condicionnan tampoco ta corecto.

E mesun actitud aki cu SEPPA ta cualifica di incorecto, nan ta compar’e cu algun di e dunadonan di trabao cu a core ‘masacra’ nan propio trahadonan, y tira nan responsabilidad den scochi di nos pueblo. Nan ta haya cu ta hopi dunado di trabao cu a actua cu nan trahadonan, di e mesun forma cu Hulanda ta haci cu Aruba, esta impone !.

Nan ta haya increibel e posicion cu Hulanda ta tuma frente Aruba. Si Hulanda ta papia di democracia, transparencia, negociacion, dialogo real y etica e mester para pa esaki tambe. No por ta asina cu Aruba ta sufri daño grandi aheno na nos control y Hulanda ta asumi un actitud abusado contra nos ciudadanonan.

Trahadonan na Aruba, pues un gran parti di ciudadanonan di Aruba ta wordo manda cas. Un mayoria grandi den incertidumbre di kico ta spera nan. A pesar di e ayudo di gobierno cu FASE y despues cu subsidio di salario. Y den tur esaki Hulanda en bes di yuda e ciudadano na Aruba, ta probecha di nos debilidad como pais y kier obliga nos contra tur leynan of regla, pa acepta condicionnan cu ta mina nos derecho como pais.

Esaki ta mescos cu probecha contra e ser humano cu hamber cu no tin otro opcion cu acepta abuso con tal e come un tiki. Ta parce cu Hulanda ainda ta biba cu e rencor cu e hecho cu Aruba tin su Status Aparte y awe e a haya e oportunidad pa primi e Rubiano.