Ayera e sindicalista di SEPPA, Magaly Brito hunto cu un grupo di docente a para dilanti di Bestuurskantoor pa expresa nan desaprobacion riba e maneho y cambionan cu Minister Rudy Lampe ta bin cu nan riba tereno di enseñansa.

Tur e gruponan di trahadonan di Centro Multi Disciplinario, Traimerdia, SEPB, Scol Practico pa Ofishi (SPO) y Colegio San Nicolas, ta rabia pa e maneho di e minister. Tambe Brito ta agrega cu tur e otro docentenan cu ta traha den enseñansa tambe a cuminsa lanta bos di protesta. E ta ripiti cu pronto lo tin un encuentro cu e docentenan pa bin cu un decision pa mustra si nan ta malcontento cu e direccion cu enseñansa en general ta bayendo.

Pa tal motibo Brito a tene un reunion cu hefe di gabinete actual, Prome Minister Evelyn Wever-Croes, teniendo na cuenta cu e preocupacion di e docentenan cu a wordo treci dilanti den e reunionnan cu nan a yega di sostene cu e mandatario mes di enseñansa, no a wordo teni na cuenta. Segun e sindicalista e decision cu ta wordo tuma di parti di e mandatario, ta decisionnan pa ‘cada biaha kibra e parti di enseñansa.’

Den e reunion di ayera mainta cu SEPPA a mustra prome mandatario, cu for di aña pasa tin decision di Conseho di Minister, entre otro riba tur esunnan cu ta traha den enseñansa cu mester tuma nan por ehempel den vastedienst. Mientras di ripiti –segun Brito- ainda e trahadonan aki ta ricibi carta e siman aki cu nan ta gradici pa nan servicio. Tin algun di nan cu a wordo ofreci trabounan di menos pago y otro simplemente no tin trabou pa nan. Tur esaki nan ta interpreta como un forma di represalia.

Mayoria di e grupo cu a bay compaña e lider di SEPPA tabata trahadonan di Scol Practico pa Ofishi (SPO) tanto di Sta. Cruz como di Brazil. Brito a bisa cu na Brazil cierto momento a lok e portanan y e docentenan mes no sa cual tabata e intencion di esaki. Igualmente el a laga sa cu e sindicatonan tanto SEPPA como SIMAR a indica conhuntamente cu e trahadonan aki lo bay den accion ayera mainta y lo bin busca un contesta cerca e prome mandatario.

Brito a laga sa cu e mesun situacion ta wordo presenta na SPO Sta. Cruz. Brito a indica cu mediante carta nan ta purba di convence hende cu aparentemente tin conseho di parti di departamento di Scolnan Publico (DPS) pa no Sali manifesta sino haci esaki despues di ora di trabou. “Tur esaki ta forma di intimida trahadonan pa no sali pa nan derecho.”

E lider sindical ta cuestiona e echo cu e mesun Minister Lampe a indica den Parlamento cu ta bay respeta e derecho di manifestacion y protesta di e docentenan y trahadonan den cualkier forma cu ta. SEPPA kier haya un splicacion cu ta bin bou un ordo di su mesun persona. Of e mester manda un mensahe cla cu otronan cu ta traha den un nivel mas halto cu ta represent’e na pia di trabou, kier tuma paso di intimidacion na pia di trabou.

Contrario na loke Minister Lampe a yega di expresa diahuebs ultimo durante un conferencia di prensa, esta cu no tin conflicto laboral ni incertidumbre cerca e trahadonan di e tereno di enseñansa, sino diferencia di opinion, SEPPA no ta di acuerdo cu esaki. Segun secretario general di e sindicato aki, nan kier contesta ‘cla y raspa’ di e mandatario riba den cual direccion e ta bayendo.

El a bisa cu e trahadonan aki no tin miedo di cambio, pero naturalmente e mandatario por para keto y discuti. “Si e cambionan aki ta bon pa nivel di enseñansa, nan ta e profesionalnan, anto e ora nan por bisa bo,” el a bisa. Tambe SEPPA ta haya cu e mandatario mester para keto y evalua na unda bo ta touch e posicion huridico di e trahadonan aki. Pero e sindicato aki ta mira cu te dia di awe esaki no a wordo haci.