Maestronan cu tin muchanan di nan scol na e Centro di Observacion a acudi na SEPPA cu nan preocupacion di e informacion no oficial cu tin riba red social cu minister di Enseñansa tin planea pa cera e Centro di Observacion.
E rason pa esaki no ta claro. Maestronan ta hopi preocupa cu e muchanan lo bin bek den nan klas. Den un klas cu 20 pa 30 mucha no tin manera pa yuda muchanan cu mester ayudo intensivo.
Trahadonan di Centro Multi-disciplinario, miembronan di SEPPA tambe ta vocifera nan preocupacion grandi pa loke ta trata e plannan di minister di Enseñansa pa cera e Centro di Observacion. E ceramento di Centro di Observacion lo nifica un deteriora di e calidad di cuido, ayudo y enseñansa pa e muchanan aki cu tin mas mester di dje, segun e sindicato.
Otro preocupacion cu tin pa cu e desaroyonan actual den enseñansa primario, ta cu varios trahado di Centro Multi-disciplinario a bay traha awor ‘na disposicion’ di scolnan. Pero e trahadonan aki no a wordo reemplasa, cu na su bes ta pone cu e trabou ta keda acumula, segun SEPPA.
“Tambe no tin miras pa reemplaso a corto plaso cu consecuencia negativo pa e servicio (p.e. proceso di aplicacion, test psicologico, guia y conseho) cu tin cu otorga na scolnan y alumnonan. No tin claridad con ta pensa di soluciona e problemanan aki a corto plaso efectivamente mirando cu e lista di espera na Centro Multi disciplinario ta keda crece. E situacion aki ta crea hopi intrankilidad pa tur envolvi”, segun e sindicato.
SEPPA tambe a pidi e minister di Enseñansa un reunion pa trata e tema aki. “Con por lanta un departamento den gobierno y ta simplemente manda e hendenan aki awor bay traha na disposicion di e.o. un fundacion.”
Nan ta continua cu: “Ta hopi grito tin di e diferente docentenan, kendenan ta esunnan cu ta na e luga di trabao y cu ta haya nan mes cu tin cu atende awor cu e muchanan cu tin problema. Mayornan cu tambe ta sclama pa solucion pa nan yiu cu tin problema di indole di mester di ‘atencion extra of diferente’ y cu ta bisto cu e docente no por duna na e yiu.”
Centro Multi disciplinario
Centro Multi disciplinario ta un departamento di gobierno cu ta consisti di diferente seccion, entre otro un Centro di Experticio y un Centro di Observacion. E Centro di Experticio ta caminda mayor y scol por acudi ora cu a señala problema di siñamento, problema di comportacion y/of problema di comunicacion. Un team di diferente profesionalnan den nan ramo ta haci investigacion psicologico, didactico y tambe di logopedia pa duna conseho y guia.
Na 2015 e Centro di Observacion (Observatiecentrum), a habri su portanan. Meta di Centro di Observacion ta pa brinda ayudo y guia na e grupo di muchanan caminda e severidad di e problemanan riba diferente area, ta asina halto cu ta surpasa tur ayudo cu scol y profesionalnan por brinda na scol mes.
Segun criterio stipula, e muchanan aki por bin e Centro di Observacion pa ricibi e guia intensivo necesario. Actualmente tin dos klas pa muchanan di kleuter y un eerste klas. Cada klas por tin maximo 8 mucha. Den e centro aki ta observa e muchanan, ta duna mayor guia den educacion di nan yiu, ta duna terapia, ta haci mas investigacion y ta duna enseñansa den orario di mainta. Despues di orario di mainta e muchanan ta keda den e centro te atardi pa e guia por continua.
Habilidadnan social emocional y structura ta hopi central den e guia despues di scol. E diferente profesionalnan cu ta traha den e centro. Cada un tin nan parti den un plan individual pa e muchanan por tin mas chens pa desaroya, compara cu si nan a keda den un klas di 20 pa 30 mucha of hasta na cas. E meta primordial di Centro di Observacion ta pa e muchanan por haya ayudo, observa y evalua nan desaroyo pa despues duna conseho encuanto e ayudo y enseñansa cu ta miho pa nan den futuro.
