Awe 8 di december ta e dia cu varios sindicatonan di Aruba ta uni den nan lucha sindical y ta tene un “Dia Nacional di Accion”. E accion ta cuminsando pa 7or di mainta, unda cu durante dia diferente lugarnan den sector publico y semi-publico lo “walk out” di nan trabao pa protesta e recorte salarial di 12.6%, cu gobierno a indica den un carta di dia 3 di december no lo wordo elimina.
Den un entrevista pa Bon Dia Aruba, Sra. Magaly Brito, presidente di Sindicato di Empleadonan Publico y Priva Aruba (SEPPA), a indica cu pa SEPPA, desde dialuna nan ta bezig cu diferente ‘walk-out’ y situacionnan di mal contento. Segun e comunicado publica ariba rednan social, e ‘Dia Nacional di Accion’, lo tuma den transcurso di dia unda cu e diferente sindicato y lugar di trabao publico y semi-publico lo protesta pa un ora na diferente orario.
Sra. Brito a splica cu e motibo pakico a parti e ‘Dia Nacional di Accion’ di forma ey, ta pasobra cu e dia ey tin di haci cu diferente sindicato, y di otro banda e sindicatonan ta purba acomoda e posibilidad pa tur trahado por participa den e accion nacional cu ta bin ta pasando pa e ultimo tres dia aki.
“Mi ta kere cu tur sindicato naturalmente tin e obligacion pa scucha su miembronan y di acuerdo cu e peticion di su miembronan e ta tuma un posicion. E hecho cu den e ultimo tres dia aki tin manifestacion di diferente grupo- y trahadonan cu ta mustra nan mal contento, esey caba ta e contesta cu nos tin pa gobierno como dunador di trabao. Eyfo tin un grupo grandi di trahadonan cu ta mal contento cu e hecho cu gobierno ta sigui insisti pa retene of mishi cu salario of entrada di trahadonan, mientras cu tur e argumentonan pa esaki ya no ta existi mas”, el a agrega.
Locual ta empeora e situacion, Brito ta splica, ta e hecho cu gobierno na e momentonan aki mes tin diferente biaha caba ta tumando personal den servicio den funcionnan cu en realidad no ta funcionnan cu ta esencial. Y esey ta haci cu e mal contento entre e trahadonan ta creciendo. El a sigui splica cu e hecho cu gobierno kier retene placa di salario di e trahadonan ta haci cu e trahadonan ta considera cu ta nan salario lo bay sigui paga of subsidia salario di e personanan cu gobierno ta tumando actualmente.
Pa loke ta trata e peticion cu Gobierno di Aruba a haci na Hulanda pa reduci e porcentahe di recorte salarial di 12.6% pa 6.3%, Brito a indica cu e decision ey gobierno mester a discutie of negosh’e na mesa cu e sindicatonan. Y no manera cu el a sucede, unda cu gobierno ta dicidi, gobierno a manda y pidi. “Al contrario, prome cu e fase aki lo tabata mas na su luga y como respet pa e trahadonan, pa a sinta na mesa dialoga, wak kico si por y na kico nos por yega. Pasobra ta parce cu e dunador di trabao aki a dicidi cu ta 6.3%, kisas e trahadonan tabata kier mas, pero e discusion aki e no a hib’e na mesa y esey ta locual nos ta lamenta”, el a agrega.
E situacion di e werksternan, specialmente e werksternan di SKOA, ta uno cu pa hopi tempo tabata den luz publico y den discusion. Poco tempo atras Minister di Enseñansa, Endy Croes, a indica den un rueda di prensa cu el a forma un comision special pa bin cu un solucion pa e problematica aki. Ariba e tema aki Sra. Brito a indica cu te ainda no tin mucho informacion di esey, “y e ta un lastima”. El a señala cu SEPPA tabatin un reunion cu Minister di Enseñansa ariba agenda pa awe diaranson 8 di december, pero teniendo na cuenta cu awe ta ‘Dia Nacional di Accion” y nan no ta na altura si Minister Croes tin e informacion disponibel tampoco pa comparti cu nan pa asina nan por papia tambe cu e werksternan, e werksternan di SKOA specificamente. “Asina tur hende e ora ey por ta un poco mas trankil cu nan entrada y cu nan cupo di trabao ta salvaguardia”, el a bisa.
