Diamars mainta tempran, mediador di gobierno Anselmo Pontilius a bay atende un referendum solicita pa SEPPA, cu a tuma luga den e sede di Boogaard Assurantien. E orario di e referendum tabata di 8’or te 10’or di mainta. E hecho cu el a tuma luga na pia di trabou, esaki a facilita cu e trahadonan por a vota mas lihe.
Un total di 45 trahado tabatin derecho di voto y 44 a haci uzo di e derecho aki prome cu 10’or di mainta, locual a haci cu e orario di e ciere di e referendum a bira mas tempran. E resultado a mustra cu di e 44 trahado cu a vota, 34 a vota pa sindicato SEPPA y e resto di e trahadonan a vota pa niun sindicato.
Den e caso aki, sindicato SEPPA tabatin mester di 23 voto pa gana e referendum, y nan a haya 34 voto. Na final di e referendum conforme na e ley, mediador di gobierno a recomenda ambos partido pa sinta na mesa mas lihe cu ta posibel. Usualmente ta e sindicato cu ta presenta un proposicion pa negosha condicionnan di trabou apart di esunnan existente.
Awe traimerdia tambe ta tuma luga otro referendum pidi pa sindicato FTA pa e trahadonan di Garage Cordia, for di 1:30 di merdia te cu 3:30 atardi na oficina di mediador di gobierno.
