Secretario General di SEPPA, Magaly Brito, a entrega dos manifiesto na Minister Presidente, Evelyn Wever-Croes, durante e accion di protesta di empleadonan publico, diaranson ultimo. Un manifiesto tin di haci cu situacion di empleadonan publico, empresa estatal y fundacion subsidia pa gobierno. E di dos manifiesto tin di haci cu nan miembronan cu ta traha como werkster na SKOA.
Den manifiestonan entrega, sindicalista Brito a bisa cu Covid-19 a bira e excuus nobo. Nan a dicidi di realisa e marcha aki pa mustra nan posicion y mal contento riba diferente desaroyo. E ta haya cu sacrificio di tur hende pa atende e crisis di coronavirus ta necesario, ya cu ‘esaki ta un berdad’. Un luna pasa nan a yega di expresa nan solidaridad y un biaha mas ta reitera esaki, el a bisa
Sinembargo nan ta condena e hecho cu te dia di awe, gobernantenan y tur esnan cu ta rond di nan, ta keda insisti den medionan di comunicacion cu trahadonan di gobierno no ta solidario. Tambe nan ta purba di trece division entre trahadonan di sector priva y sector publico. SEPPA ta contradeci tur informacion “diferente y falso” cu empleado publico y demas, ta egoista y no ta para pa solidaridad.
E sindicalista a afirma cu e discusion no ta e sacrificio, sino e forma cu esaki mester a sucede. Nan ta consciente cu Aruba mescos cu paisnan rond mundo, ta confronta momentonan dificil. Nan sa cu pa atende cu e direccion cu e pais bay, mester di e sosten di un y tur. Segun Brito e manifestantenan kier mustra cu nan ta solidario cu tur trahado.
P’esey un biaha mas nan ta reitera e solidaridad di empleado publico, trahadonan di fundacion subsidia, NV estatal, pero tambe tur otro trahado cu igualmente ta sinti e impacto di e medidanan cu a wordo tuma dor di gobierno entrante 1 di mei 2020.
Igualmente SEPPA ta rechasa cualkier forma di impone riba salario di trahadonan. El a bisa cu un luna pasa nan a entrega nan posicion y condicionnan ariba peticion di gobierno pa entrega riba salario y condicionnan secundario di empleado publico. Pero despues gobierno a dicidi di impone riba nan salario.
Segun secretario general di SEPPA, niun dunado di trabao no por dicidi riba su mes, sin negociacion y sin un acuerdo riba e salario di su trahadonan. “Esaki ta contra e derecho fundamental di e trahadonan,” Brito a bisa. Mientras for di e manifestantenan no por a scucha e gritonan di: abuso!.
Pa loke ta e di dos manifiesto entrega na Minister Presidente, sindicalista Brito di SEPPA a laga sa cu e werkster na SKOA ta trahando den un incertidumbre. E sindicato ta critica e echo cu desde december 2019 te awor, minister di Enseñanza kier cambia tur cos y mustra cu e werksternan aki mester wordo paga diferente. E problema aki SEPPA ta haya cu mester wordo resolvi na mesa, unda nan representantenan sindical mester forma parti di dje pa asina por sigura e cuponan di trabao y entrada di e werkster na servicio di SKOA.
