Resultado pa e di segundo trimester di 2023
Banco Central di Aruba (BCA) a conclui e encuesta di percepcion di negoshi pa e di segundo trimester di 2023. E encuesta di percepcion di negoshi ta evalua e percepcion economico di e negoshinan local.
Durante e di segundo trimester di 2023, e asina yama ‘Business Perception Index’, cu ta consisti di e indicenan di condicionnan economico actual y condicionnan economico a corto plaso, a crece for di 106,0 te na 106,6 (mira Grafiek 1)[1]. E resultado ta debi na un subida den tanto e indice di condicionnan economico a corto plaso, como e indice di condicionnan economico actual.
Grafiek 1: ‘Business Perception Index’
Fuente: Banco Central di Aruba
E indice di condicionnan economico a corto plaso a aumenta cu 0,9 punto di indice te na 106,0, compara cu 105,1 den e di promer trimester di 2023. E indice di condicionnan economico actual a expande te na 107,0 den e di segundo trimester di 2023 (Grafiek 2). Mita di encuestadornan ta premira un crecemento economico flat den e siguiente 12 luna, esaki ta un subida di 11,8 punto di porcentahe compara cu e trimester anterior. E porcentahe di encuestadornan cu ta anticipa un crecemento economico positivo den e siguiente 12 luna a nota un bahada di 5,3 punto di porcentahe te na 38,3 porciento.
Grafiek 2: Condicion Economico actual y Condicion Economico a corto plazo
Fuente: Banco Central di Aruba
E relato completo di e encuesta di percepcion di negoshi ta disponibel ariba website di BCA www.cbaruba.org
Tocante Banco Central di Aruba
E proposito principal di Banco Central di Aruba (BCA) ta pa contribui na stabilidad financiero y prosperidad economico di comunidad di Aruba. BCA ta logra e mision aki door di implementa un maneho monetario efectivo dirigi na mantene stabilidad di balor di e florin, promove e solides y integridad di e sistema financiero y yuda mantene un sistema di pago eficiente y confiabel.
Banda di su tareanan principal, BCA ta encarga cu emision di biyete di florin y moneda di florin y ta e bankero di gobierno. Ademas e ta regula e transaccionnan di pago cu exterior y ta administra e divisanan di Aruba y ta controla e uzo di esaki.
Pa mas informacion tocante Banco Central di Aruba, por bishita su website www.cbaruba.org
- E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu negoshinan no ta ni optimista, tampoco pesimista, pero ta neutral den nan pensamento di desaroyo economico na Aruba. Entre 100 y 110, e indice ta mustra un situacion di optimismo den pensamento di negoshinan ↑
