Banco Central di Aruba (BCA) a conclui e encuesta di percepcion di negoshi pa e di cuater trimester di 2023. E encuesta di percepcion di negoshi ta evalua e percepcion economico di e negoshinan local.

Durante e di cuater trimester di 2023, e asina yama ‘Business Perception Index’, cu ta consisti di e indicenan di condicionnan economico actual y condicionnan economico a corto plaso, a subi for di 105,3 te na 106,9 (mira Grafiek 1). E resultado ta debi na crecemento den tanto e indice di condicionnan economico a corto plaso, como tambe e indice di condicionnan economico actual.

E indice di condicionnan economico a corto plaso a subi cu 1,9 punto di indice te na 107,1, compara cu 105,2 den e di tercer trimester di 2023. E indice di condicionnan economico actual a crece te na 106,8 den e di cuater trimester di 2023 (Grafiek 2).

Den termino di expectativa relata na crecemento economico como 59,1 porciento di negoshi encuesta ta anticipa un crecemento economico positivo den e siguiente 12 luna. Esaki ta un crecemento di 22,4 punto di porcentahe compara cu e trimester anterior. E porcentahe di negoshi encuesta cu ta anticipa un crecemento economico negativo a baha cu 15,9 punto di porcentahe te na 4,6 porciento, mientras cu e porcentahe di negoshi encuesta cu ta premira un crecemento economico flat a baha cu 6,5 punto di porcentahe (Grafiek 3).

E relato completo di e encuesta di percepcion di negoshi ta disponibel ariba website di BCA www.cbaruba.org

Tocante Banco Central di Aruba

E proposito principal di Banco Central di Aruba (BCA) ta pa contribui na stabilidad financiero y prosperidad economico di comunidad di Aruba. BCA ta logra e mision aki door di implementa un maneho monetario efectivo dirigi na mantene stabilidad di balor di e florin, promove e solides y integridad di e sistema financiero y yuda mantene un sistema di pago eficiente y confiabel.

Banda di su tareanan principal, BCA ta encarga cu emision di biyete di florin y moneda di florin y ta e bankero di gobierno. Ademas e ta regula e transaccionnan di pago cu exterior y ta administra e divisanan di Aruba y ta controla e uzo di esaki.

Pa mas informacion tocante Banco Central di Aruba, por bishita su website www.cbaruba.org