Dos strea di Kpop, kende a haci joke online over di droga y abuso sexual, a yora mientras nan a ricibi sentencia di prizon pa violacion sexual di dos victima.
Ayera, dos cantante di Kpop a ricibi sentencia di prizon na Sur Korea, despues di ser haya culpabel di violacion den grupo di dos muhe, y un di e condenadonan a admiti di filma secretamente y distribui videonan di sex.
Jung Joon-young y Choi Jong-hoon, ambos di 30 aña di edad, a cay na yoramento mientras nan a ser haya culpabel di violacion di dos diferente victima na dos diferente ocasion na 2016. Jung tambe ta condena di filma su mes durante sex cu otro hendenan muhe, sin nan conocemento, y comparti e video 11 biaha sin nan permiso. El a ricibi seis aña den prizon, y Choi cinco.
Ambos tabata miembro di gruponan di chat online cu tabata comparti grabacion secreto di actonan sexual, y a haci joke di droga y viola hende muhe, segun corte di districto central di Seoul a bisa. Sentenciando e dos homber, hues Kang Seong-soo a bisa cu nan a regarda hende muhe como ‘obheto pa placer sexual’.
E veredicto a bisa cu e dos homber ‘a participa den violacion den grupo di victimanan kende tabata intoxica y incapaz di resisti’. “Ta dificil pa imagina e nivel di sufrimento cu e victimanan mester a sinti.” E caso ta e ehempel di perfil mas halto di un epidemia di crimen di ‘spycam’ na Sur Korea, cual a causa rabia y a pone hendenan muhe protesta na Seoul, cu e lema ‘mi bida no ta bo porno’.
E corte tambe a sentencia cada homber na 80 ora den educacion di ‘tratamento pa violencia sexual’. Ambos homber a cuminsa yora ora a anuncia nan sentencia.
Identidad di e victimanan tabata scondi pa protege nan privacidad.
Jung a admiti di distribui e videonan, maske a bisa cu e sex semper tabata cu permiso.
Choi, ex miembro di e grupo FT Island, a nenga di a viola e muhe, y a bisa cu e no tabata corda di a tene relacion sexual cune, y cu si e lo a haci esaki, probablemente tabata cu permiso.
