Ayera tardi, Corte di Apelacion a duna su sentencia den e ontnemingszaak (caso di confiscacion) contra ex-minister Paul Croes, cual ta forma parti di caso IBIS. Despues di e sentencia, fiscal di prensa Patrick van der Biezen a duna un splicacion tocante kico precies e caso ta y kico e sentencia aki ta nifica.

Van der Biezen a splica cu e caso aki ta los di e caso penal, den sentido cu e no ta e caso penal mas pasobra e caso penal a wordo completa y Croes a wordo sentencia den prome instancia na Hof. El a apela contra esey den casacion na Hoge Raad y casacion a duna su veredicto aña pasa na februari. Cu esey e sentencia a bira irevocable.

Den e caso aki, el a sigui splica, na 2021 Corte den Prome Instancia a duna su sentencia unda a indica cu Croes mester paga un suma di alrededor di 183mil florin. E suma ey ta consisti den un parti di un suma cu a wordo laba, ongeveer 75 mil florin y e otro parti ta un suma di 128 mil florin cu no por declara di unda e placa ey a bin. Conhuntamente e sumanan ey ta forma poco mas di 183 mil florin.

Van der Biezen a indica cu den e caso penal, Hof a bisa cu e sumanan ey a wordo laba y esey a keda fiho, pasobra e caso penal a bira irevocable y e mesun rasonamento ey, Corte den Prome Instancia a usa. Tambe mesun prueba cu a wordo usa den e caso penal a wordo usa den e caso aki na unda a yega na e suma di un poco mas di 183 mil florin cu Croes mester paga back.

Durante e veredicto Hof a tuma su decision, Ministerio Publico (OM) a pidi pa confirma e sentencia ey, y esey, fiscal van der Biezen a indica, ta locual practicamente Hof a haci: a confirma cu Croes tin cu paga e suma back.

Pero tin un cambio chikito na e suma cu Croes mester paga. Van der Biezen a splica cu Hof a bisa ayera cu e ta rebaha e suma ey cu 20 mil florin pa motibo cu e abogado defensor di Croes a trece pa dilanti cu e tempo cu un caso mester wordo trata a pasa y Hof a tene esey na cuenta y a otorga un rebaho di 20 mil florin.

Mara na dje, el a agrega, Hof a bisa tambe cu si e no paga e suma ey, e tin cu sinta un castigo di 18 luna. El a subraya cu e punto di salida di OM ta pa Croes paga e suma, y no ta asina cu OM ta buscando pa e sinta mas castigo den e caso aki.

El a señala cu pa e motibo ey tambe un par di aña pasa, OM a pone un conservatorbeslag riba e cas cu Croes tin. Den caso cu no por paga, den medida OM lo por bende e cas.

Van der Biezen a resalta cu e sentencia no ta irevocable ainda y defensa tin e oportunidad pa bay den casacion atrobe contra e sentencia aki. Na momento cu esaki bira irevolcable, e ora por bay over na ehecuta e sentencia. Defensa tin un periodo di dos siman pa tuma decision pa wak si ta bay den casacion si of no.

Abogado Desiree Croes, ken a representa Paul Croes den e caso aki, a expresa cu nan “ta desapunta” cu e sentencia aki, pasobra defensa a trece hopi punto pa dilanti cu Hof no a considera. El a resalta cu nan ta contento si cu a duna un rebaho di 20 mil florin riba e suma.

Croes a indica cu ta remarcable si cu e caso IBIS a cuminsa bisando cu Paul Croes a horta miyones, y cu miyones di florin a wordo laba, pero loke por prueba ta un suma “hopi mas chikito” di loke a cuminsa e caso aki cune.

“Ta importante pa trece pa dilanti cu pais Aruba a hinca masha hopi placa den e caso aki, sigur gasta hopi mas cu locual a resulta cu lo por a wordo laba. Bo ta pensa con bo mester mira esey den total,” el a señala.

Abogado Croes a splica cu ademas nan a trece pa dilanti cu nan ta kere cu e caso aki ta un tipo di “overkill” pasobra e ta straf riba straf hopi pisa, unda cu a kita Paul Croes su libertad, ainda e ta na KIA, e no por ta politico – cual ta algo cu el a studia p’e – e no por traha como ambtenaar y aworaki ta kita placa di dje.

“E ta constantemente castigonan hopi pisa y mi ta haya cu Hof mester a considera esey mas. Ta jammer tambe cu no a tene consideracion cu e dianan cu el a pasa den isolacion cual tabata eigenlijk contra tur tipo di derecho humano. No a considera esey den su strafzaak y no a considera esey den e caso aki tampoco siendo cu el a pasa mas di 80 dia den isolacion, locual cu nunca den Reino a yega di pasa,” el a enfatisa.

Despues di e sentencia ayera abogado Croes a indica cu e ta bay sinta cu su cliente pa asina determina kico ta bay ta e siguiente stap cu nan ta bay tuma, si ta acepta e sentencia aki of si ta bay corte di casacion.