E homber R.A.G. a wordo atraca violentamente pa un grupo di siete persona riba 26 di juli 2015 den area di hotelnan high-rise. Durante e atraco aki e taxista a wordo tira cu un arma den candela den su cara y a resulta gravemente herida. Tur siete sospechoso a wordo deteni den e lunanan cu a sigui. E caso a wordo trata riba 12 di februari ultimo.
E caso contra e atracador cu a supuestamente los e tiro, e homber A.S.E.E., a wordo posponi pa raportahe sicologico, y ta planea pa sigui wordo trata riba prome di april 2016.
Corte a dicta sentencia den e casonan di e otro seis sospechosonan. Fiscal a exigi contra e sospechoso A.D.G. (19) un castigo di 7 aña, y ehecucion di jeugddetentie di 4 luna, pa cual el a wordo condena anteriormente den otro caso. El a wordo condena pa 4 aña di prison incondicional. Tambe Corte a duna ordo pa ehecuta e jeugddetentie di 4 luna. Fiscal a exigi contra e sospechoso J.C.C. (18) un castigo di 6 aña. El a wordo condena pa 4 aña, di cual 6 luna ta condicional. Contra e sospechoso S.A.G.S. (20) a keda exigi un castigo di prison di 4 aña pa complicidad den e atraco arma. El a wordo declara liber pa medeplegen y a wordo condena pa accesoria na e atraco pa 30 luna, di cual seis ta condicional.
Contra e sospechosonan menor di edad J.J.H. (18) y A.J.J.V. (17), fiscal a exigi, aplicando ley penal pa adultonan, un castigo di prison di 5 aña. Sin embargo, Corte a haci uso di ley penal pa hobennan y a condena nan pa 21 luna di jeugddetentie. E sospechoso C.-C.M.T. tabatin solamente 15 ana bieu tempo di e atraco. Contra dje a wordo exigi, aplicando ley penal pa hobennan, jeugddetentie di 9 luna, di cual dos ta condicional. Huez a dicta segun exigencia di fiscal pa loke ta T. Ministerio Publico ta considerando actualmente pa apela algun di e sentencianan.
