Sentencia caso New York: Hues a declara periodistanan culpable di violacion di secresia oficial y soborno

Ayera mainta den corte, hues a dicta sentencia den caso New York y a condena cuater periodista local cu ta sospechoso di, entre otro, soborno di agente policial y violacion di secresia. E caso aki ta relaciona na e caso di agente policial R. Vos, ken a keda acusa y sentencia pa su participacion.

E sospechosonan di inicial R.P.L, B.L.R.K, N.E.A.G y N.M.Q.C.d.A. ta acusa di, for di periodo di prome di januari 2021 te cu 22 di maart 2023, conhuntamente intencionalmente a viola secretonan cual nan tabata sa cu e ambtenaar, relaciona cu su funcion, tabata obliga pa tene. Nan ta acusa di, den e periodo ya menciona, a participa den un organisacion cu tabata consisti di un y/of mas otro persona cu tabatin como meta pa comete crimen, esta, corupcion di un ambtenaar y/of tuma y/of duna soborno y/of maluso di funcion y/of violacion di secreto di trabao.

Abogado di tres di e sospechosonan, Doris Canwood, a splica den su declaracion na prensa cu di e acusacionnan cu tabatin riba mesa, pa e acusacion di soborno tres di e sospechosonan a ser declara culpabel. Pa loke ta e acusacion di participacion den un organisacion criminal, tur cuater sospechoso a ser declara liber, pasobra corte ta haya cu no tin suficiente prueba cu nan a comete e acto ey. Y pa e acusacion di violacion di secresia oficial di un agente policial, tur cuater a ser declara culpabel.

Corte a determina cu durante un periodo di mas cu dos aña, e periodistanan aki tabatin acceso na e trafico di portofon di Cuerpo Policial di Aruba. Nan a haci e acceso aki posibel hunto cu e agente policial menciona, pa medio di un conexion digital cu nan a crea entre un portofon y e laptop di e periodistanan individual. Debi na e hecho cu hunto cu e agente policial nan a haci e acceso na e trafico di portofon posibel, mescos cu e agente policial aki, nan a viola secresia oficial.

Corte a determina cu den e mesun periodo, tres di e periodistanan a duna regalonan y a haci promesa na e agente policial, pues cu di e manera aki nan a soborn’e.

E informacion policial cu ta distribui pa medio di portofon ta informacion confidencial, cu no ta destina na oyentenan no autorisa. Si e informacion aki yega na personanan robes na e momento robes, ta viola e privacidad di ciudadanonan y esaki por conduci na situacionnan peligroso of no desea. Pa e motibo aki, e informacion aki ta confidencial y disponibel solamente pa agentenan policial.

Abogado Canwood a resalta cu e castigonan cu corte a impone ta hopi menos cu loke fiscal a pidi. Esaki ta pa motibo cu hues a tene cuenta cu e circunstancianan personal y e rol di e diferente sospechosonan.

Den e caso di sospechosonan R.P.L y N.E.A.G, ambos a haya 240 ora di trabao comunitario y 12 luna di castigo di prizon condicional, cu un periodo di prueba di 3 aña. E abogado a splica cu esaki kiermen cu si nan haci nan mes culpabel di algo criminal den e 3 aña aki, nan por haya condena di 12 luna di prison.

Den caso di e sospechoso B.L.R.K, el a haya castigo di 150 ora di trabao comunitario, tres luna di prison condicional cu un periodo di prueba di 3 aña tambe. Den caso di B.L.R.K, teniendo cuenta awor e ta residencia na Hulanda, su abogado a splica cu tin dealnan cu Reclassering na Hulanda cu na momento cu e castigo bira incondicional, e ora e por tuma contacto cu reclassering na Hulanda y e lo cay bao di nan guia.

Sospechoso N.M.Q.C.d.A. a haya e castigo mas pisa di tur. Door cu ta su di dos biaha envolvi den un caso similar, el a haya un castigo di 18 luna di prison di cual 12 ta condicional, locual kiermen cu e tin cu sinta minimo seis luna den prison, mirando cu e sucedido aki a pasa net dos luna prome cu su tempo di prueba relaciona cu e caso anterior a caba.

Abogado Canwood a indica tambe cu e peticion di fiscal pa detene N.M.Q.C.d.A. mesora a keda rechasa. Hues a splica cu e motibo pa esaki ta cu nunca antes N.M.Q.C.d.A. tabata deteni y e no ta wak e balor agrega pa detene e sospechoso di biaha, y ademas a tene cuenta tambe cu e cantidad di tempo cu a pasa entre e sucedido y e decision den corte.

Pa loke ta trata posibilidad pa apelacion, e abogado a señala cu e mester papia cu su clientenan prome pa wak si nan ta desea di apela, pues no por a menciona na e momento ey si e sospechosonan lo bay den apelacion. Pa tanto Ministerio Publico (OM) y e sospechosonan ta conta e periodo di dos siman pa entrega posibel apelacion.

Un di e puntonan cu defensa a presenta ta cu periodistanan tin libertad di recopila noticia, y cu esaki ta inclui e informacion cu e sospechosonan a haya pa medio di e portofon. Hues a splica den su sentencia cu e ta di acuerdo cu e argumento aki y a resalta cu e ta un derecho importante cu mester ser proteha y respeta.

Sin embargo, hues a subraya cu e no ta un derecho sin limite. El a splica cu ta ser limita pa derecho penal y pa normanan di cuido debido. Esaki ta significa cu periodistanan no mag di comete hechonan castigabel pa obtene informacion, y esaki ta precisamente loke a bay fout den e caso aki; e sospechosonan a comete hechonan castigabel pa haya acceso na e informacion confidencial.

Mientras tanto, agente Vos a keda condena dia 8 di december 2023 cu 16 luna di prison, di cual 8 ta condicional, pa malversacion, violacion di secretonan di trabao, abuso di su funcion y soborno di parti di miembronan di prensa. Ademas el a wordo prohibi di eherce e trabao di polis pa e duracion di 3 aña. Ministerio Publico a bay den apelacion contra e sentencia aki.