Sense y nonsense tocante LNG Y produccion di energia en general

Den e dianan cu a pasa nos por a presencia un debate candente den parlamento tocante e contrato cu WEB Aruba NV a cera cu Eagle LNG pa suministro di gas natural na e empresa estatal di Aruba. Di ambos banda tabata enfatiza cierto aspectonan cu no ta completamente cubri pa hecho palpable, o no ta toca tur e aspectonan cu ta relevante. Nos lo trata di resumi nan aki.

En general e situacion global di produccion y consumo di combustible fosil, mirando e desaroyo di calentamento di nos planeta, ta moviendo den direccion di kita di Heavy Fuel Oil (HFO) y bay mas den 1.) combustible fosil cu ta menos dañino cu HFO, manera LNG; 2.) inverti den produccion di energia alternativo cu no ta envolve uso di combustible fosil.

Aruba a cuminza caba cu e transicion den direccion di un futuro sin combustible fosil; prueba di esaki ta e contribucion – ainda minoritario – di energia di biento y solar na nos produccion diario. Nos ta pone un banda un rato e discusion si nos ta avanzando cu suficiente rapidez y diligencia den esaki.

Aruba como productor ‘stand alone’

E hecho innegable cu nos tin un unidad di produccion y consumo riba su mes ta haci cu den caso di emergencia nos no por haya apoyo di ningun fuente di exterior. Riba un continente paisnan grandi mes ta conecta nan rednan di distribucion di energia electrico cu otro, y ta apoya otro, den cuestion di seconde o minuut, den restablece nan suministro na nan respectivo rednan. Esaki ta haci cu, hasta ora riba un dia regular cerca nos e produccion di coriente por bin di fuente no fosil, e back up system pa e produccion ta ainda necesariamente un combustible fosil, fuel o gas por ehemplo. Esaki ta conta tanten cu no tin un alternativa pa e back up den forma di un fuente no fosil. Esaki por ta por ehemplo e uso di hidrogeno (hydrogen, waterstof) como combustible cu ta inmediatamente disponible pa ‘take over’ e tarea di e fuente di back up di combustible fosil. Asina na Europa na varios pais ta realizando esaki caba, reemplazando e back up di HFO cu unidadnan di deposito di hidrogeno, cu ta ser produci cu energia solar o di biento. Den e tempo di cambio tecnologico rapido aki ta di duda cu mester warda 20 aña pa cuminza haci e reemplazo di combustible fosil como back up te despues.

Lo anterior ta indica cu den e cambio pa energia renovable ta papiando di dos elemento: e cambio pa energia renovable pa e produccion average diario y e capacidad di reserva cu pa un tempo ainda lo ta cu combustible fosil, mientras ta sigui desaroyo tecnologico cu ta haci posible converti nos back up system tambe den energia renovable.

‘Inversion di Aruba’

Nos ta tende hopi tocante e ‘inversion biyonario’ cu Aruba lo mester haci. Esey mester clarificacion. Aruba na e momento aki ta pagando un suma anual di entre Afl. 150 pa Afl. 170 miyon na compra di HFO pa genera coriente y produci awa. Esey den 20 aña ta mas di Afl. 3 biyon, pero no ta ‘inversion’. Como consumidor nos ta paga un suma mas grandi ainda den 20 aña, pa cubri tanto inversion como compra di material necesario pa produci, manera HFO, plus mantenimento di e instalacionnan, etc. Esey finalmente ta defini un prijs pa unidad (KWh) pa e consumidor. Pero esaki no tin directamente un relacion cu e inversion cu e compania Eagle LNG ta haci pa crea e infrastructura pa por suministra WEB gas natural. Esey e compania ta hinca den e prijs pa unidad cu ta cobra WEB pa hiba e combustible te na e punto di entrega acorda. Finalmente e consumidor ta paga henter e paquete, pero esey ta asina na tur parti di mundo.

Prijs pa consumidor lo baha?

Di banda gubernamental ta trece dilanti cu e cambio pa LNG lo trece un bentaha di un prijs reduci pa e consumidor. Esey por ta e caso, pero no por comproba esey di antemano; practica di e tempo venidero lo bisa si esey ta e caso. E resultado final mester ta un prijs razonable, mirando e circunstancianan di mercado mundial. Pa esey, mester tuma algun aspecto na cuenta. Por ehemplo, cu e demanda pa gas natural mundialmente ta creciendo rapidamente, a base di e cambio mundial señala di petroleo pa gas natural. Esaki por haci cu den futuro e bentaha den prijs di gas compara cu HFO lo no ta asina grandi mas. Sin embargo, ta keda e bentaha di un combustible cu ta kima mas limpi, haciendo menos daño na medio ambiente.

Peligro di tuberia

Escogencia di ubica e planta di conversion y almacenage na tereno di e refineria ta haci necesario tuberia cu ta core pasa den varios bario residencial. Di un banda ta argumenta cu tin tuberia ta core den e bario pa mas di 50 aña caba. Sin embargo, no tabata trata di tuberia di gas bao presion manera awor, sino di fuel oil. Ademas, norma pa e tipo di infrastructura industrial a cambia desde e tempo ey. En todo caso un analisis mas di cerca di e normanan cu DTI tin pa e tipo di instalacion aki ta mas cu oportuno y ta dificil pa imagina cu e tubonan lo keda core riba tera.

Alcance di e proyecto

For di e representante di Eagle LNG ta comprende cu e instalacionnan cu e empresa ta bay construi ta trata solamente di esun necesario pa por suministra gas natural na WEB. Esey no ta encera instalacion di LNG na tera, sino di un deposito di CNG. Pues no ta contempla tampoco algun infrastructura necesario pa eventualmente suministra gas natural na un refineria cu ta bin den operacion atrobe. Esaki poniendo un banda e discusion tocante e probabilidad of no di tal reapertura. No ta papiando tampoco di Aruba como un punto di distribucion (‘hub’) pa otro cliente den exterior. Sí a menciona e posibilidad di ‘bunkering’ pa barco cu ya ta usa gas natural na lugar di fuel oil. Si ta contempla esaki pa por ehemplo barco crucero, anto lo tene cuenta cu e piernan den haf di San Nicolas no ta apto actualmente pa ricibi e barco crucero grandinan. E opcion lo ta pa usa e reef berth pa esaki. Na e momento aki no ta conoci ki inversion esey lo bay requeri.

Contrato entre RdA y Eagle LNG

Un punto importante cu no a toca den e debate recien ta e acuerdo di huur of lease cu mester ta existi entre Refineria di Aruba NV y Eagle LNG. Ta inimaginable cu no ta existi un acuerdo caba, pasobra ta di suma importancia pa un compania ta na altura ki gasto e ta bay tin cu e tereno unda e ta bay pone su actividad. Ta importante cu ta bin claridad riba e punto aki tambe.