Sense y nonsense di mercado laboral
Ki dia nos ta siña?
Desde hopi aña nos ta lucha cu e problema cu no tin dato confiabel di mercado laboral. Un biaha pa aña tin un encuesta laboral, cu facilmente dentro di un par di luna por resulta di ta eroneo, pa motibo di un evento mayor. Por ehemplo, un empresa grandi a cera su porta y e porcentahe di desempleo a cambia substancialmente. Un porciento di nos forsa laboral ta algo mas di 500 persona y nos por yega na esey rapidamente. No ta pornada cu na Merca por ehemplo ta haci investigacion, incluyendo encuesta, y ta duna resultado tur siman… Nos no mester di cifra nobo tur siman, pero pa bati riba pecho cu nos tin un cifra cada aña, ta cuestion di gaña bo mes y otronan cu e trabao ta haci debidamente. Por lo menos den e ultimo binti aña gobernacion ta parce di ta ignora e echonan aki.
Ultimamente sinembargo, nos por a tuma nota di e cifranan cu DIMAS a duna di entrada di trahado for di stranheria. Nan ta yamativo. Segun DIMAS, aña 2015 a tramita mas di 15.000 peticion pa estadia, di cual 9910 ta relaciona cu trabao. Tin casi 4000 di e total ta peticion pa prome biaha, di cual por supone cu mas o menos dos tercera parti ta pa trabao, cu ta mas o menos 2500 peticion. E resto (7400) ta pa cambio di trabao of prolongacion. Sorprendente? No pa e conocedonan di e materia, cu no ta hopi. Nos ta mira cu mercado laboral pa hopi aña caba no por depende di e forsa laboral local so y mester di importacion di trahado. Pero, nos ta tende regularmente: “tin tanto hende local sin trabao, pakico laga tanto hende drenta anto?” Esey tin varios motibo.
Uno ta cu dentro di e grupo desemplea no tin persona cu e habilidad exigi. Si tin wega cu hende ta haci cu e exigencianan aki, esey ta sigur, pero ta na e autoridadnan concerni pa sa di detecta esey y honra e peticionnan veredicto. Tambe mester tuma na cuenta cu den tur economia un cierto porcentahe di desempleo ta ‘frictional’; esaki por ta te 5% di desempleo. Esaki ta e hendenan desemplea, talbes temporalmente pasobra nan ta trata cambiando di trabao y ta temporalmente desemplea. Tur economia mester tambe di cierto desempleo pasobra si desempleo ta 0%, anto ningun dunado di trabao no por contrata un persona pa reemplasa, pasobra e persona ey no ta disponibel. Generalmente ta tuma desempleo riba 5% como e parti problematico cu mester elimina. Kico esaki ta significa pa Aruba? Si e cifranan di ultimo aña di Departamento di Labor ta corecto (ainda) anto nos tin un desempleo di alrededor di 7,5%. Riba un forsa laboral cu ta den direccion di 55.000 trahado nos ta papiando di algo mas di 4000 persona desemplea, di cual un tercera parti (1200 pa 1300) ta nos problema di desempleo, y no 4000 manera hopi hende ta pensa.
Tin otro aspecto pa tuma na cuenta. Repetidamente e anterior director di Oficina Central di Estadistica (CBS) a trece dilanti den e ultimo añanan cu nos a drenta e fase di desaroyo demografico, unda e total di hoben cu ta disponibel pa drenta mercado laboral anualmente no ta suficiente pa reemplasa e personanan di edad cu ta stop di traha y ta bay biba di nan pension. Esaki tin como consecuencia cu hasta si nos economia no ta crece y no ta crea cupo nobo di trabao, asina mes anualmente nos ta importa un cierto cantidad di trahado djis pa mantene e forsa laboral na nivel. Mientras nos hobennan cu ta subi mercado laboral no ta yega na mil pa aña, nos ta importando un par di mil trahado di exterior, sin crecemento substancial di Mercado. Nos sa cu nos mandatarionan no ta desea di reconoce e hecho aki, pero esey no significa cu e no t’ey. E cifranan di entrada cu DIMAS ta duna ta papia pa nan mes.
Si tin un manera pa cambia esaki? A corto plaso sigur cu no. Nos tin un economia basa riba uzo extenso di man di hende, y menos basa riba inversion di capital. Esaki no solamente ta inherente na e sector turistico, sino tambe na un gran parti di e sectornan cu ta brinda servicio na otro sector economico y na publico en general. Nos mester tene na bista cu gran parti di e crecemento di cupo di trabao cu no ta exigi tanto conocemento y por lo tanto no ta tanto bon paga, no a tuma luga den turismo mes sino den e sectornan di servicio.
E situacion aki ta un di e argumentonan valido pa stop cu creacion di mas hotel grandi, cu ta rekeri e entrada masal di trahado di exterior, riba loke cu nos ta importando caba pa keda na mesun nivel. Ta remarcabel cu e gobierno actual, manera nos a bisa varios biaha caba, ta gusta papia di ‘sostenibilidad’, pero ta nenga rotundamente di papia riba e ‘insostenibilidad’ di e modelo economico cu nos a maneha den e ultimo trinta añanan.
