Manera nos matutino a bay ta publica tin un epidemia creciente di loke ta e virus di Zika, y cu paisnan rond di Aruba manera Colombia y Venezuela cu e epidemia aki, e situacion ta bira cada bes mas alarmante. Cu informacion cu agencianan di salud internacional a trece pa dilanti, un señora na estado a subi Twitter pa anuncia cu el a cancela su “babymoon” pa Aruba.
E infeccion a wordo gelink na defecto di baby y advertencianan di biahe ta creciendo. E señor di New York Christine Arce-Yee tabata entusiasma pa un delaster biahe prome cu e nacemento di su yiu. Sinembargo Despues cu el a tende di e peliger cu virus Zika por trece pa muhenan na estado, specificamente e conexion cu defecto el a bisa: ‘Oh my God, is it in Aruba? Because I can’t take that risk.’
Bon Dia Aruba a trata di haya e dokter na Departamento di Salubridad Publico (Despa) pa trece informacion actualisa na comunidad di locual ta andando cu e virus aki y kico ta haciendo na Aruba, sinembargo ainda no a haya contacto cun’e.
Ta fin di december cu informacion a sali cu e Virus a cuminsa drenta Venezuela. Departamento di salubridad publico a bisa di a reuni cu tur sector cu tin di haber cu turismo. Tambe a reuni cu tur e teamnan cu ta yuda combati sangura manera GKMB, Epidemiologia y Dienst Besmetelijke Ziekten. Tambe a tuma contacto cu ATA, AHATA, Serlimar, polis di Bario, entre otro,pa nan ta alerta y monitor e situacion.
A keda di crea un grupo di vigilancia y monitor, pa asina evita entrada, of contene esaki den caso cu e bin banda di nos isla.
