Segun informacion di Ministerio Publico, un di e miembronan di famia cu a bebe un orange juice posiblemente venena aña pasa a fayece ayera den hospital. Su restonan mortal a wordo tuma den beslag ayera despues di merdia. Vocero di Ministerio Publico, sra. Ann Angela ta confirma na Bon Dia Aruba cu e motibo pakico e curpa ta den beslag ta pasobra ta trata di un morto no natural. Autopsia lo tuma luga na cumisamento di otro siman. Segun Ministerio Publico, e autopsia lo tin cu mustra di kico precies el a muri. “Posiblemente e tabata victima di un venenamento. E señora a bay Colombia pa tratamento y despues bin bek Aruba unda cu finalmente el a fayece den hospital. E tabata hopi grave tempo e cos a pasa,” sra. Angela ta bisa.
Posibel caso di venenamento
Diamars 23 di november 2016, rond di 10’or di anochi, un famia a bay cumpra un orange juice pa nan bebe na cas. Tur e 5 personanan na e cas tanto hende homber y muhe a bebe for di e juice aki. Algun di nan a bira malo y transporta cu urgencia pa hospital. Recherche a presenta na e supermarket Kinppo Foodcenter situa na Cura Cabay caminda cu e famia a cumpra e juice. Departamento forensico di Cuerpo Policial tambe a presenta y a tuma e juice den beslag pa investigacion pa loke ta e likido aden. Esaki ta pa saca afo si por ta trata algo asina di veneno di djaka. Recherchenan a mira henter e video di grabacion di e supermarket pa wak ki ora e personanan a cumpra e juice.
Segun Ministerio Publico, dos miembro di e famia a bira malo despues di a bebe e juice. E señora cu a fayece ayera tabata hopi grave pero e otro hoben no. Bon Dia Aruba a bishita Gerencia di Kinppo Supermarket e tempo ey kende a bisa cu ya caba a test algun di e juicenan di e mesun marca anto no a haya nada straño.
