Un di e metanan cu Prome Minister Evelyn Wever-Croes a propone desde cu el a cuminsa goberna nos pais na 2017, ta pa baha gasto di personal despues cu a constata e gasto halto den personal y salario bao di e Prome Minister anterior, señor Mike Eman. Esaki ta e caso tambe ainda y mas ainda den e situacion cu nos Pais ta den na unda cu mester baha gasto di personal y cumpli cu exigencianan di Hulanda.

Segun un comunicado di gobierno, un ehempel di esaki ta cu Gobierno di Aruba a baha gasto cu nombramento di señor Ady Thijsen recientemente como Minister Plenipotenciario Interino na Arubahuis. Señor Thijsen ta tambe e representante pa Aruba di Union Europeo na Brussels y ta Presidente di ExCo di OCTA. Señor Thijsen tin dos funcion na Europa y un salario y por bisa cu siguridad cu señor Thijsen ta eherce un trabao excelente den ambos funcion.

Ambos funcion ta resorta bao di Ministerio di Asuntonan General di Prome Minister. Esaki ta haci cu e ministerio aki ta baha gasto no solamente di salario, pero tambe di hospedahe. Cu esaki tambe, Prome Minister no tin mester di gasta na biahe pa Hulanda frecuentemente. Señor Thijsen den su funcionnan ta representa Aruba den Gobierno di reino y ta studia tur documento y leynan cu tin di haber cu reino.

Prome Minister Wever-Croes a enfatisa cu e problema di gasto di personal a sali for di man bao di Gabinetenan Eman. Nan a tuma cantidad grandi di persona den servicio. Desde cu Gabinete Wever-Croes ta na mando, e gastonan di personal a baha so. Contrario na señor Eman, Prome Minsiter Evelyn Wever-Croes ta tuma gobernacion hopi na serio y ta traha na bienestar di nos pueblo cu cantidad minimo di personal pa asina tene gastonan di personal mas abao cu por.

Eman a traha cu 147 persona directo bao di su ministerio cu a costa nos pueblo 11.323.300 florin na salario. Mientras e gastonan di Ministerio di Asuntonan General 2017 pa 2021, Prome Minister Wever-Croes a traha cu 22 persona den su oficina, esaki ta 125 persona menos y 85% menos di loke Eman a traha cune. E 22 personanan aki a costa 2.738.300 florin na salario. Esaki ta 8.585.000 florin menos y 76 % menos di loke Mike Eman tabata gasta na salario.

Y pa e di dos periodo di Gobernacion, Prome Minister Wever-Croes a baha gastonan di personal mas ainda, trahando cu 21 persona, cu un total di 2.342.591 florin na salario. Esaki ta 8.980.709 florin menos y 79% menos di loke Mike Eman tabata gasta na salario.

Prome Minister Evelyn Wever-Croes: “Hunto, mi oficina, mi ministerio, cu ta inclui ami, mi secretaria, mi conseheronan y tur cu ta traha mi den mi oficina, a logra baha gasto. E no ta facil. Tin hopi menos hende y e trabao mester wordo parti den menos hende cu ta haci e trabao hopi mas dificil. Pero mi ta hopi satisfecho cu e sosten cu mi ta haya di tur esnan cu ta traha pa mi oficina”.