(AP) – E prome minister di Senegal a bisa diahuebs cu e gobierno ta cera “tur base militar stranhero,” un anuncio esencialmente dirigi contra Francia, e potencia colonial anterior di e nacion Oost-Africano.
Aunke prome minister Ousmane Sonko no a nombra explicitamente trupanan Frances, ningun otro forsa stranhero tin base militar na Senegal.
Francia a sufri di perdidanan similar den algun pais Oost-Africano durante e ultimo añanan, incluyendo Chad, Niger y Burkina Faso, unda trupanan Frances cu tabata presente durante hopi añanan a ser expulsa.
Sonko a haci e anuncio aki durante un declaracion di politica general na e Asamblea Nacional, sin duna un periodo pa e salida di trupanan Frances. E anuncio ta bin un luna despues cu presidente di Senegal, Bassirou Diomaye Faye, a bisa cu pronto no lo tin mas soldadnan Frances riba tera Senegales.
“E presidente di e republica a dicidi pa cera tur base militar stranhero den futuro,” Sonko a bisa. E ministerio militar y di Relacionnan Exterior di Francia no a responde inmediatamente riba e anuncio.
Francia, un potencia colonial anterior den hopi parti di Africa, ta enfrentando oposicion di algun lidernan Africano tocante loke nan ta describi como un actitud despectivo y fuerte riba e continente.
Francia, cu ya a sali for di paisnan plaga pa rebelion manera Mali, Burkina Faso y Niger, a confirma diahuebs cu nan a entrega e prome di algun base na Chad.
E presencia militar permanente di Francia na Chad “ya no ta cumpli cu e expectativanan y interesnan di cada partido,” segun e militarnan, y nan a nombra e retiro como parti di un “reconfiguracion di su sistema den Africa” desde 2022.
Paris a bisa anteriormente cu Francia ta purba reduci su presencia drasticamente den tur base na Africa, cu excepcion di Djibouti, incluyendo e 350 soldad Frances cu ta na Senegal. Nan a bisa cu nan por den su luga ofrece entrenamento di defensa of sosten militar specifico, basa riba necesidadnan expresa door di e paisnan, segun e oficialnan.
E gobierno nobo di Senegal, cual ta na poder pa menos di un aña, a tuma un posicion fuerte contra e presencia di trupanan Frances como parti di un reaccion mas amplio den e region contra loke hopi ta percibi como e legado di un imperio colonial opresivo.
