Diaranson ultimo, senadornan Chuck Schumer (D-NY) y Tom Cotton (R-AR) a enfoca riba e app Chines, TikTok, pidiendo oficialnan di inteligencia Mericano investiga esaki pa cualkier menasa cu e por representa pa siguridad nacional.
E carta na director di inteligencia nacional, Joseph Maguire, ta urgi oficialnan pa investiga e practica di colecta data di TikTok pa determina si gobierno Chines tin algo di bisa tocante ki contenido Mericanonan ta mira riba e app.
“Mirando e preocupacionnan aki, nos ta pidi Comunidad di Inteligencia pa realisa un evaluacion di e riesgonan pa siguridad nacional representa pa TikTok y otro plataforma di contenido basa na China operando na Merca, y informa Congreso riba e hallazo”, Schumer y Cotton a skirbi.
Durante e ultimo aña, legisladonan a bira mas y mas preocupa tocante companianan operando na Merca vincula cu China. Berano ultimo, Marco Rubio (R-FL) a lansa atake contra companianan di telecomunicacion manera Huawei y ZTE tocante nan lealtad na gobierno Chines. Den simannan recien, hopi di e mesun critica a bay pa TikTok, un app pa comparti video cual a crece den popularidad cerca usuario Mericnao.
Schumer y Cotton ta skirbi cu TikTok a ser download mas di 110 miyon di biaha na Merca so.
E luna aki, Rubio a skirbi na secretario Steven Mnuchin pidiendo pa e Committee on Foreign Investment in the United States (CFIUS) investiga TikTok pa menasa potencial pa siguridad nacional y pa censura tambe. Na september, The Guardian a reporta cu TikTok ta rekeri su moderadonan pa censura cualkier contenido referiendo na Tiananmen Square, independencia di Tibet, of Falun Gong. E compania ta sostene cu esaki ta reglanan antiguo, y cu moderadonan di TikTok no ta ricibi influencia di gobierno Chines.
Tiktok ta reacciona.
Ayera, TikTok a reacciona despues di simannan di ta victima di acusacion di tin vinculo cu gobierno Chines. Riba un blog, TikTik a mantene cu no ta censura contenido critico di gobierno Chines, y cu ningun di su operacionnan ta suheto na ley Chines.
“Na TikTok, nos ta tuma e asuntonan aki increibelmente serio”, segun e blog post. TikTok a sigura cu gobierno Chines no por haya acceso na ningun data di usuarionan Mericano. “Nos ta tene tur data di usuario Mericano na Merca, cu backup na Singapore. Nos centro di data ta pafo di China y no ta suheto na ley Chines.”
Ademas, e compania a reitera cu gobierno no tin influencia riba moderacion di contenido. “Gobierno Chines nunca a pidi nos pa elimina ningun contenido y nos no lo hacie tampoco si nan pidi. Punto”, e blog post ta bisa.
