(AP) — Senadornan Republicano ta acusando administracion di Biden di usa $39 biyon destina pa contrui fabricanan di chip di computer pa pusha ideanan “woke” manera rekeri pa algun recipiente ofrece cuido di mucha y curasha e uso di sindicato.
E administracion a bisa cu e elementonan aki di e guianan pa fondo anuncia diamars ta bay mehora e probabilidad di atrae companianan pa construi e fabricanan di semiconductor y hende pa traha eynan – un reto clave cu por determina e exito di e programa. Ta mira e guianan como un punto di salida pa traha cu companianan cu ta sigura balor pa pagadonan di belasting.
E tension ta un ehemplo di e desconfiansa partisano cu por lanta na Washington hasta riba un punto di agenda cu legisladornan di ambos partido ta bisa ta vital pa seguridad nacional Mericano. Republicanonan ta bisa cu e administracion, den implementa e ley, ta purbando di pusha prioridadnan cu ta complace e base Democrata. Nan tambe ta argumenta cu e guianan ta bay aumenta e costo di construccion di plantanan di semiconductor y lo afecta cualkier sentido di confiansa.
Pero oficialnan di e administracion ta bisa cu e guianan por yuda adresa dos reto fundamental den e plannan di gobierno pa transforma Merca den e lider mundial den produccion di chip di computer avansa: e companianan mester labor cualifica y nan mester innovacionnan cu por reduci costonan di produccion.
Si e inversionnan ta bay ta exitoso, segun Secretario di Comercio, Gina Raimondo, e companianan mester haya y train diesmiles di trahador, desde welder te ingeniero electrico. Mas importante, e industria mester desaroyonan cientifico pa reduci e costo di traha chip na Merca pa competi cu Asia, Raimondo a bisa.
E placa pa e fabricanan ta bin di e CHIPS and Science Act cu presidente Joe Biden a firma haci ley na augustus ultimo. E ta inclui $11 biyon pa investigacion ademas di e $39 biyon pa construi fabricanan di chip di computer avansa. Incentivonan di impuesto ta hiba e inversion total na $52 biyon.
Chipnan ta circuitonan integra cu ta pega den e semiconductor, un material – notablemente silicon – cu por maneha e fluho di coriente electrico. Hopi biaha ta usa e terminonan “chip” y “semiconductor” intercambiablemente.
Ta usa chipnan di computer den tur cos, desde auto te co’i hunga y armanan avansa, haciendo nan mesun fundamental pa e era digital como hero y steel tabata den era industrial.
