(RFI) – E politico Colombiano, congresista di Pacto Historico, a fayece diasabra ultimo na un clinica na Medellin, dianan prome cu e lo a cumpli 68 aña pa via di un ataca di curason. E tabata conoci pa su lucha di logra un salida negociabel pa e conflicto arma, semper tabata un figura polemico.

Colombia a perde un di su politiconan mas controversial y representativo na mesun momento. Conoci pa su lucha pa logra un salida negociabel pa e conflicto arma cu e guerrilla di FARC na e momento ey y pa su participacion den negociacionnan pa libera e rehennan di e grupo arma aki, Piedad Cordoba a fayece na Medellin diasabra ultimo. Presidente di e pais Gustavo Petro, a confirma e noticia señalando “como congresista ma conocel’e y como senador a muri. Un liberal berdadero a muri.”

Den e decada di aña 2000, durante gobierno di Alvaro Uribe (2002-2010), Cordoba, cu na e momento ey tabata senador pa Partido Liberal, a sirbi di mediador, hunto cu e ex-presidente Venezolano Hugo Chavez pa libera varios persona cu tabata secuestra pa guerrilla di FARC.

Debi na su activismo pa iskierda, na 2010 e procurador general Colombiano na e momento ey, Alejandro Ordoñez, a kit’e for di su funcion y a inhabilit’e pa 18 aña pa eherce un funcion publico.

E politico naci na Medellin na 1955, tabatin varios aña den e sombra pero despues cu su condena a ser anula el a bay back den politica atendiendo un yamada di e presidente actual di iskierda Gustavo Petro.

Su relacion cu e guerrilla FARC tabata hopi controversial, y varios biaha a bira obheto di investigacion. Na 2022, el a ser acusa pa un ex-asesor di dje di retrasa e liberacion pa haya mas beneficio politico. Corte Supremo di Husticia a reconoc’e como victima di siguimento y tapgesprek ilegal den su comunicacion cu gobierno di Uribe. E mesun corte ey tabata investigando Cordoba pa enrikece su mes ilegalmente.

Di otro banda, varios dirigente politico Latino Americano a lamenta e fayecimento di e senador manera e presidente di Venezuela, Nicolas Maduro “Kerida amiga Piedad, cuanto bataya bo a mester enfrenta y libera pa bo patria. Guerero incansabel y un di e muhe mas balente cu mi a conoce, un revolucionario grandi, luchado, defensor di derechonan humano y di e paz di e pueblo,” el a skirbi riba e red social X.

Presidente di Cuba, Miguel Diaz-Canel, tambe a reacciona riba X y a manda “su condolencia na famia y amigonan di e senador Piedad Cordoba,” di ken a bisa cu “durante hopi aña a traha pa Paz di Colombia y tabata un bon amigo di Cuba.”

Ex-presidente Argentino Cristina Fernandez di Kirchner a expresa cu Cordoba, ken a muri cu 68 aña tabata “un dirigente politico Latino Americano comprometi cu e paz di Colombia stima.”