Senado ayeranochi a rechasa e mocion di banda di partido Democrata pa trece testigo aden den e proceso di impeachmente trata den e camara halto di Congreso Mericano. Cu esaki ta practicamente sigur cu no lo destitui presidente Donald Trump. Sin embargo, a yega na un acuerdo pa laga e voto final pa diaranson otro siman.
E votacion riba e mocion a duna como resultado 51-49, cu un votacion casi perfecto segun lineanan di partido. E senadornan Republicano Susan Collins di estado Maine y Mitt Romney di Utah a vota hunto cu e Democratanan pa testigo, pero esey no tabata suficiente.
A pesar di cu e Democratanan a enfoca hopi riba scucha testimonio nobo, e mayoria Republicano a pone e demanda ey un banda pa asina tene e prome caso di impeachment den Senado sin testigo. Hasta e revelacionnan nobo ayera di anterior asesor di seguridad nacional John Bolton no por a cambia pensamento di e senadornan Republicano, cu a bisa cu nan a tende suficiente.
“Esaki ta implica cu un eventual resultado pa Trump lo ta solamente un absolucion “den nomber so,” asina Representante Val Demings di Florida, un di e procuradornan pa Camara di Representante , a bisa durante e debate final. “Otronan lo yam’e un cover-up.”
E proceso di impeachment di presidente Trump a aterisa asina den un aña alectoral cu un nacion totalmente dividi. Dialuna votacion den e proceso di eleccion di un candidato presidencial pa partido Democrata ta cuminsa na Iowa y Trump ta tene su discurso di ‘State of the Union’ un dia despues.
