Senado Hulandes ta rechasa legislacion di Traha for di Cas pa un solo voto

(NLTimes)—E legislacion di Traha for di Cas a ser rechasa pa un solo voto ayera den Eerste Kamer, e Senado di e Parlamento Hulandes. E legislacion lo a haci’e mas facil pa empleadonan yega na un acuerdo cu nan hefe pa traha for di cas.

E legislacion “Work where you want” lo a nifica cu empleadornan no por rechasa un peticion di traha for di un otro localidad facilmente, cu e excepcion di motibonan sosteni den “sensatez y husto.” Empleadornan lo mester a evalua peticionnan pa traha for di cas y otro sitionan cu e mesun consideracion cu ora un emplea pidi pa traha un par ora mas of menos.

A rechasa e propuesta aki ayera cu 38 contra 37 den fabor. Senadonan for di e partido politico di Prome Minister Mark Rutte, esta VVD, no a indica di antemano pa cual banda nan lo vota. Nan dies miembronan den Eerste Kamer a rechasa e legislacion.

Acompaña pa e partido mas grandi den e Senado, BBB, cual ta ocupa 16 asiento. E otro partidonan cu a vota en contra ta inclui PVV (4 asiento), Ja21 (3), FVD (2), SGP (2), y 50Plus (1).

E 14 miembro di e segundo partido mas grandi, Groenlinks-PvdA, a vota en fabor di e legislacion. Nan a ser acompaña pa CDA (6 asiento), D66 (5), SP (3), Christen Unie (3), PvdD (3), Volt (2) and OPNL (1).

E propuesta for di GroenLinks y D66 a ser acepta pa un gran mayoria di Tweede Kamer dia 5 di juli. Solamente PVV, Forum voor Democratie y Van Haga a vota en contra. Ta parce cu mayoria di e fraccion ta acepta e propuesta durante e debate den Eerste Kamer dia 12 di september. Sinembargo, e voceronan di algun partido a cuestiona e sentido y necesidad di e legislacion. Otro a puntra nan mes si e ley lo crea demasiado presion regulatorio pa empleadornan.

Tambe tabatin preocupacionnan tocante empleadonan den regionnan di frontera pa ken acuerdonan haci durante e periodo di pandemia no ta aplica mas. Sindicato FNV no tabata contento cu e resultado di e votamento. Vice-presidente Kitty Jong a conta ANP cu esaki tabata “hala for di realidad, y un oportunidad perdi” cu e Senado a rechasa un propuesta cu tabatin hopi apoyo den e pais.