(AP) – Operacion pa cambia genero pa menornan lo ser prohibi na Wisconsin bao un proposicion cu ta na caminda pa ricibi aprobacion final den un legislatura controla pa GOP diamars.
Gobernador Democratico Tony Evers a compromete su mes cu e lo rechasa e medida cu a trece centenares di persona den oposicion na un audiencia anteriormente e luna aki. E Asamblea a aproba e proposicion aki siman pasa, sin ningun voto Democratico, y e Senado ta premira di duna su aprobacion final riba diamars, cual ta nifica cu esaki lo yega Evers. “E proposicion cruel aki no mester ta riba nos calendar awe,” Senador Democratico Mark Spreitzer a expresa prome cu e debate. “E no ta bay bira un ley.”
Democraticonan y otro personanan den oposicion di e proposicion, incluyendo esunnan cu ta representa e comunidad LGBTQ+ a argumenta cu introduci e prohibicion ta agrega na e desafionan cu e hubentud transgenero ta enfrenta caba. “Nos ta papiando di muchanan,” Spreitzer a bisa. “Muchanan djis kier biba nan bida, tin bon resultado na scol y si, ricibi e cuido medico cu nan tin mester.”
Republicanonan cu ta sostene e proposicion a sugeri cu e opinion di expertonan medico lo cambia e importancia di e tipo di operacion aki, aunke e ta disponibel na Merca pa mas di un decada caba y ta promociona pa varios asociacion medico grandi. “Proteha muchanan for di intervencionnan medico cu ta invasivo y permanente ta lo corecto pa haci for di un punto di bista etico y cientifico,” e patrocinador lider di e proposicion Senador Duey Stroebel a expresa den su testimonio diamars.
Autoridadnan Republicano den henter e pais kier limita e derechonan di hobennan transgenero, causando un rechaso fuerte for di e comunidad y causando demandanan di discriminacion den e caminda. Por lo menos 22 estado ya caba a cuminsa cu leynan unda ta restringi of prohibi e cuido medico di genero pa menornan transgenero y mayoria di e estadonan aki ta enfrentando demandanan actualmente. Operacion di cambio di genero pa menornan ta poco comun, cu menos di 3,700 ehecuta na Merca riba pashentnan di entre 12 pa 18 aña desde aña 2016 te cu aña 2019 segun un estudio publica den augustus.
E proposicion en cuestion di Wisconsin ta un di varios den e estado cu ta den contra di personanan transgenero y cu Evers a priminti di rechasa. E Republicanonan no tin suficiente voto pa por surpasa e rechaso.
