Diamars ultimo Senado di Brasil a aproba como definitivo e proyecto di ley cu e gobierno di Temer a presenta, cu ta enfoca na limita e aumento di gasto publico durante e siguiente 20 aña. E proyecto a haya 53 voto na fabor y 16 voto contra.
E proyecto a ser tramita cu caracter di amienda constitucional, pa tal motibo e propuesta a ser presenta pa votacion 2 biaha den Camara Alta. Diamars pasa e camara halto a duna su aprobacion cu hopi protesta di banda di oposicion, cu a cualifica e norma aki como un “crimen di lesiona patria”
E limite ta impone recorte severo di gasto publico durante dos decada proximo den area cu mester presencia di gobierno, manera salud, educacion y atencion na hende pober.
E grupo di oposicion a fracasa cu su intencion di detene e proceso di votacion den Senado y mediante un demanda inconstitucional cu nan a presenta den Corte Supremo, pasobra e demanda aki no a ser acepta di banda di magistrado Luis Roberto Barroso, un di diesun miembro di e tribunal.
E amienda ta trata e aumento di e gasto publico anual cu lo ta limita durante proximo 20 aña a un tasa di inflacion cu nan a tuma di e aña fiscal anterior y cu nan por revisa e limite di inflacion despues di 10 aña di su aprobacion. Segun gobierno a bisa e limite cu nan kier pone por detene e proceso di aumento di debe publico den relacion cu Producto Interno Bruto (PIB), cu ta considera e unico manera pa recupera e ekilibrio fiscal.
Fatima Becerra, senador di partido di Trahado (PT) a bisa cu gobierno kier revoca pa 20 aña e inversion den hende mas pober di Brasil, y cu nan no ta preocupa pa pone un limite di pago di debe externo pa e grupo di banco cu ta solicita placa”.
Protesta na Brasil despues di congela gasto publico
Despues di aprobacion di congela gasto publico, hopi manifestante a sali pa protesta y enfrenta cu polis na avenida di Brasilia, unda e principal edificionan gubernamental di Brasil ta localisa.
Durante dos ora largo e manifestacion tabata activo y a laga dos polis y un manifestante herida, polis militar di Brasil a bisa.
