Senado di Argentina a proba den un sesion extraordinario cu a dura te cu diasabra marduga, un proyecto di ley presenta pa Gobierno di Alberto Fernandez cu ta declara nuebe area di emergencia den Estado y ta establece varios medida pa sali di e recesion economico.
“Cu 41 voto na fabor, 23 contra y 1 abstencion a keda aproba e proyecto di Ley di Solidaridad Social y Reactivacion Productivo. Sin otro topico pa trata, e presidente di (Senado y vice-presidente di nacion), Cristina Fernandez a duna finalisacion pa e sesion special”, Camara Halto a publica den Twitter.
E proyecto di ley presenta pa Gobierno ta declara e emergencia publico te cu 31 di december di 2020 na nuebe area di Estado: Economico, financiero, fiscal, administrativo, previsional, tarifario, energia, sanitario y social.
E texto ta señala e creacion di un impuesto nobo ‘Para una Argentina Inclusiva y Solidaria’ (PAIS), cu ta impone pa proximo cinco aña un 30% den e compra di divisa stranhero y e consumo di bien of servicio na exterior, como e compra ti pasashi pa biaha.
E proyecto ta mantene na vigor e decision di e administracion anterior di limita 200 dollar pa luna e compra pa atesoramento di persona fisico.
E 70% di loke tin planea pa recauda pa via di iniciativa aki lo destina pa siguridad social, mientras cu 30% cu ta resta lo dedica pa obranan di vivienda y infrastructura.
Entre tanto, gobierno tin contempla otorga 5.000 peso (80 dollar) na december y januari pa personanan hubila cu ta cobra e pension minimo, sin disminucion di otro aumento di cada tres luna cu Poder Ehecutivo lo dispone.
