(Infobae) – Diaranson ultimo Chile a haya un jornada historico despues cu Senado a conclui e proyecto di matrimonio igualitario, den cual lo regula e union entre parehanan di mesun sexo y normanan di filiacion.
Despues di aproba e texto, e organismo nacional a manda e proyecto aki pa su di dos procedura legislativo, na unda e iniciativa lo cay den man di e diputadonan cu lo wordo revisa pa parlamentarionan.
E votacion di diaranson ultimo a desaroya den dos bloki, na prome luga, a vota pa e normanan cu lo regula e matrimonio entre parehanan di mesun sexo, y di dos luga, a somete na votacion e normanan di filiacion di e proyecto historico aki.
E prome a wordo aproba pa 28 voto na fabor y 14 den contra, mientras cu esun di dos a haya luz berde cu 29 voto na fabor y 14 den contra.
E proyecto Chileno aki lo permiti, den futuro cercano, e filiacion y adopcion entre parehanan homosexual, loke awor no ta permiti segun normanan actual. Ademas, e proyecto aki lo pretende modifica e articulo 102 di Codigo Civil di Chile, pa cu di e forma aki lo wordo elimina e expresion cu e matrimonio ta entre un hende homber y un hende muhe, pa cu lo coregi esey y lo redacta cu ta entre dos persona, y tambe lo permiti adopcion.
Nos ta recorda cu e proyecto aki tabata den lachi na parlamento Chileno sin avancenan grandi, te cu presidente di Chile, Sebastian Piñera, a sak’e back despues cu su popularidad a cay drasticamente. Su buelta a wordo anuncia dia 2 di juni ultimo den su discurso anual na e pais.
Esey a provoca e indignacion entre parlamentarionan conservador di gobierno, ya cu e iniciativa, supuestamente, no a wordo consulta pa nan. Ademas, e proyecto aproba ta e mesun cu e ex-presidente Michelle Bachelet a manda na final di su di dos mandato, na unda derecha a opone na cualkier avance.
