Siman pasa a tuma luga e resultado final di examen na tur e scolnan secundario rond di Aruba. Bon Dia Aruba a entrevista un persona di nacionalidad Latino, kende a conta su experiencia durante e periodo di scol. Pa motibo di un caso pendiente, Bon Dia Aruba a scoge di no pone e nomber completo di e persona y a wante na sra. Hernandez. Nomber completo ta conoci pa redaccion.
Sra. Hernandez a conta cu el a bin Aruba na 1995 cu 8 aña di edad. Pa motibo di ilegalidad, y paso mayornan no kier a regresa na nan pais, e no a bay scol di biaha pero a drenta curso y haya les na cas. Cu 11 aña sra. Hernandez a cuminsa scol basico den vierde klas. Cu dificultad pa siña pa motibo cu su prome idioma tabata spaño, e la forsa pa siña Hulandes ya cu Papiamento tabata mas facil.
E ta corda cu hopi alegria su prome test di KDN tabata un shete. Un gran logro pa sra. Hernandez cu no tabata sa nada di Hulandes. “Mi no ta corda henter mi periodo na scol basico pero mi a haci mi best pa logra haal mi bon puntonan pa asina bay MAVO of HAVO”, sra. Hernandez ta splica. E ta bisa cu MAVO y HAVO tabata su prioridad pa motibo cu hende rond Aruba semper tabata bise cu EPB tabata e scol cu no mester a bay. Su mama tabata encurashe pa haci su best pa logra bay mas halto. Algo cu sra. Hernandez nunca lo lubida ta cu su juffrouw den vierde a bise ‘miho bo stop, paso bo no ta bay yega leu’. E palabranan aki a cay duro pa sra. Hernandez y a demotive hopi. E tabata sa cu sin conocemento di Hulandes e lo ta bay ta dificil, pero no imposibel. “Ora tur mucha tabata bay pinta, of un actividad leuk den klas, ami mester a bay prisma (extra les) pa enfoca y asina mi mehora den idioma Hulandes. E no tabata algo leuk den e tempo ey, pero misa e tabata algo cu por a yuda ami den futuro”, sra. Hernandez a remarca.
E ta bisa cu semper na scol e tabata un mucha hopi keto, semper cu su enfoke pa por haci su best. Cu e logro den scol basico, sra. Hernandez a logra haal su MAVO. Den examen jaar el a kies ‘semi exact pakket’, esaki ta materianan manera kimica, biologia, wiskunde, di cual el a haal punto final di 8 pa cada un. Na final el a logra haal su 46 puntonan cu hopi orguyo y el a aplica pa HAVO. Colegio Arubano a nenga esaki pa motibo cu sra. Hernandez tabata tin 18 aña di edad y cu tristeza el a aplica e ora pa haci un MBO diploma na EPI.
Sra. Hernandez a splica cu su soño tabata pa studia pa bira ingeniero kimico pero pa motibo di no tin nacionalidad Hulandes el a haya su mes ta studia algo completamente diferente. Sra. Hernandez a caba su estudio na EPI y a opta pa sigui busca un titulo mas halto. El a drenta Universidad di Aruba y den cuater aña e la logra haya su Bachelor den Marketing. E kier a sigui pa su master degree pero plan a cambia. Ainda e tin speransa pa algun dia e haal su master degree pero no tin seguransa ki tempo.
Den su añanan den Universidad el a bay aplica pa su permiso. E persona cu a controla su papelnan a bisa ‘miho bo no sigui studia anto bo cuminsa traha paso ya bo ta mayor di edad’. Esaki tabata e di dos biaha cu sra. Hernandez ta tende palabranan negativo.
Sra. Hernandez ta pensa cu mentalidad di husga mester stop, e pensamento cu un mucha paso e ta di afo, e ta menos capacita. “Claro e ta dificil, pero mi ta bolbe ripiti e no ta imposibel, e ta bay cu hopi motivacion, interes y determinacion.”
“Ora mi a haya mi bachelor diploma, mi a sinti un orguyo masha grandi mes. Mi a corda con mi a cuminsa, anto na unda mi ta awo. Porta no locual mi a tabata kier den pasado pero awo mi ta un ‘freelancer marketing’ y mi ta trahando tambe”, sra. Hernandez a continua.
E kiermen e ta corda e palabranan di e juffrouw di vierde klas. “Tur locual mi a logra, mi ta corda ora mi wak e juffrouw aki un caminda. Mi no por a evita di smile cu mi mes”. Sra. Hernandez ta splica cu e no tin ningun rencor na e juffrouw, ni na algun otro hende cu a bisa no por, pero e ta spera cu awendia no tin juffrouw asina mas.
“Misa mi no ta e unico cu a pasa den mesun situacion aki, hopi ta logra, hopi kier yega mas leu, mi ta encurasha tur hoben pa no laga ningun palabra kibra bo, of bisa bo no por pa cualkier motibo sea, no stop bo metanan. Sigui bay dilanti anto crece den esaki. Mi ta uza mi ehempel pa yuda otronan”, sra. Hernandez a termina.
