Universidad di Aruba, hunto cu fundacion We Connect Aruba, lo organisa un seminario cu dia 24 di mei proximo, unda lo discuti temanan cu meta pa conecta hende hoben educa cu ta biba den exterior cu oportunidad di carera cu ta existi na Aruba.

E proposito di e fundacion ta pa conecta esunnan cu ta biba na Hulanda, of cualkier parti di mundo, pa keda conecta cu e isla di unda nan ta bin. Purbando di busca un manera pa nan bay bek na nan isla pa traha y aporta na e pais.

Patrick Brown, kende ta tesorero di e fundacion, a bisa cu a dicidi di organisa e seminario cu lo enfoca riba e distancia cu tin entre mercado laboral local y e hoben profesional cu a studia afo (y ta bibando afo), pa haci e distancia mas chikito y facil pa nan por regresa nan isla. Lo tin panelista pa e seminario, cu un tema amplio cu ta parti den pregunta cu lo discuti.

E prome tema su pregunta ta tocante educacion na Aruba, pa wak si estudio avansa cu tin den exterior ta cumpli cu necesidad di economia local di e isla. Nan a bin cu e pregunta pasobra ta ripara cu esunnan cu a caba scol secundario ta bay studia na Hulanda, y ta confronta cu problema a base di nan escogencia (cu no ta na nan agrado), anto ta cambia pa otro estudio. E pregunta ta bay si e di dos estudio ta ‘match na loke nos mester na Aruba?’

Brown ta comparti cu na Aruba mester haci algo pa guia e mucha den e caminda cu ta necesario pa Aruba. “Mundo moderno no ta haci mucho diferencia den kico bo a studia, pero mas tanto kico e competencia ta. E dunado di trabou ta wak estudio y diploma, pero por ta cu otro tipo di estudio tambe por traha na e posicion”, Brown ta splica.

E di dos tema lo bira si ‘yiunan di tera tin balor special pa mercado laboral local’. Brown ta bisa cu si, pasobra un hende local conoce cultura, sa anda cu otro y conoce e idioma. Un dunado di trabou lo ta mas interesa den e servicio di e local cu un persona stranhero, pa asina evita e proceso dificil pa permiso di trabou.

Un otro aspecto ta, entre un Arubiano cu tin menos experiencia, y un persona di exterior cu tin suficiente conocemento den area, cual ta esun cu lo scoge? Lo tuma e persona local cu no ta apto pa e trabou pasobra e ta local, anto si ta asina, ki consecuencia esey lo tin pa e persona y dunado di trabou?

E di tres tema ta kico ta e factor cu ta influencia escogencia pa regresa nan isla of pa no regresa. Brown ta splica cu hopi hende hoben ta studia afo y ta keda den exterior pa 5, te hasta 10 aña. E ora ey ta bira dificil pa nan regresa bek. Nan ta adapta na e sistema di afo.

Sinembargo, tin di esunnan cu kier regresa pa e sentimento di hogar, pero Brown ta splica cu e problema ta ora nan ripara cu mercado laboral ta ‘tiki of no flexibel’. “Den sentido cu manera moderno di traha, cu flexibilidad di orario, salario, pa haya posicion riba merito, ta falta na Aruba.”

Pa e motibo ey, hende ta mas cauteloso pa bay bek na Aruba. Sea e mercado mester adapta pa e profesionalnan hoben, of nan mester adapta na e mercado laboral. Lo tin panelista y publico pa e discusion nan aki. Segun Brown, pa pensa riba dialogo pa asunto aki.

Tambe pa esunnan cu a studia aki na Aruba den cierto facultad, pero nan trabou ta otro, of no ta haya trabou mes, Brown ta bisa cu ta bon pa nan atende e seminario, mirando cu tin e mesun problema di afo, cu no ta match cu estudio y mercado, ta conta pa esunnan cu a caba nan estudio na Aruba.

Enfoke pa por cambia e manera di traha y haci e mas facil pa nan por bin Aruba bek. E seminario lo ta pa tur e profesionalnan hoben cu kier comparti nan experiencia, e dunado di trabou pa mustra kico nan por ofrece, y pa tur esunnan cu ta interesa den e tema y discuti riba esaki. E seminario ta gratis y por registra riba e website di Universidad di Aruba