Cu e meta pa informa, educa y birnda mayornan strategia y hermentnan esencial pa lantamento positivo di nan yiu, Happy Parents Happy Children ta organisa un seminario dedica na e tema ‘Co-Parenting den Harmonia’, un tema hop i relevante den sociedad actual.

Queen-Anne Bergen, co-organisador di e seminario, a splica cu pa e seminario aki a scoge e tema di co-parenting pa motibo cu e ta un topico vital pa comunidad, pa famianan na Aruba. El a remarca cu hopi ta pensa cu co-parenting ta solamente pa mayornan cu a divorcia of separa, pero esey no ta e caso.

E seminario aki ta bay mustra cu co-parenting ta sucede cu tur mayor, separa o divorcia, pero tambe e parehanan bibando hunto, casa, esnan cu ta co-parent cu nan mayor of nan suegra y asina tin diferente scenario na Aruba cu ta trata e tema di co-parenting.

Bergen a splica cu organisando diferente otro conferencia y seminario a bin dilanti cu esaki ta un topico cu hopi mayor tin reto cune. Ademas, expertonan tambe ta bisa cu esaki ta un di e retonan mas grandi cu nan ta encontra. Hopi psicologo ta traha cu mucha, pero hopi biaha ta e mayornan mester papia cu nan pa compronde bon e scenario.

El a sigui splica cu e data cu nan tin ta mustra cu por ehempel e cifra di divorcio na Aruba ta halto y di otro banda tin e otro parehanan cu no ta casa, nan ta haya yiu jong ta biba hunto pero no ta casa. El a remarca cu data di Aruba ta mustra cu co-parenting ta pasa constantemente.

“Tur hende tin tendencia di pensa cu co-parenting ta solamente ora nos ta separa of divorcia, pero no ta asina. Si ami cu mi pareha no ta casa y nos ta lantando nos yiunan, nos ta co-parent, esnan cu ta casa mes si nan tin diferente principio, diferente manera di pensa y lanta e mucha, esey ta co-parent. Si mi ta un mayor soltero lantando e cu mi mama of cu mi suegra, mi ta bezig ta co-parent. Esnan cu ta pasa henter dia na scol bo ta co-parent cu e juffrouw of meneer pasobra ocho ora di e dia nan ta lantando bo yiu,” el a subraya.

E obhetivo principal di Happy Parent Happy Childrean ta enfoca riba mayornan, pero pa e seminario binidero e meta ta pa invita no solamente mayor, pero tur esnan cu ta forma parti di e proceso co-parent un mucha pasobra na final e mucha ta central. “Hopi biaha nos ta bisa esaki, pero bida ta pasa y bo ta lubida e ora nos kier trece recordatorio na tur e duna nan e strategianan pa nan por haci esaki di e miho forma,” el a indica.

Durante e seminario ta bay tin tres orador cu lo duna un charla. Un di e oradornan aki psicologo Johnny Boekhoudt, ken tambe tabata un orador aña pasa y hopi hende cu a bay e conferencia aña pasa gusta. Boekhoudt lo elabora riba e aspecto emocional y psicologico cu ta impacta un mucha. Kico ta e impacto psicologico y emocional riba e mucha ora ta co-parent den un forma positivo of negativo.

Otro orador di e seminario ta abogado Nancy Gravenstijn ken lo elabora riba e parti huridico. Bergen a splica cu esaki tambe ta un punto importante pasobra cifranan ta indica cu divorcio na Aruba ta halto y ta importante pa por elabora riba e aspecto aki y pa e mayornan tin informacion tocante e derechonan di tanto e mucha como e mayor.

El a agrega cu na 2021 tabatin leynan cu a cambia pa loke ta trata voogd di mucha y abogado Gravenstijn lo elabora riba tur e puntonan aki ora ta trata co-parenting.

Ultimo orador pa e seminario aki ta Laura Tromp, un parent coach residencia na Hulanda y co-organisador di e seminario. Tromp lo elabora riba e parti proactivo, loke ta encera planificacion, e parti di principionan, con pa traha un plan, e parti di comunicacion.

“Na final e obhetivo ta cu e mucha ta central. Esey ta loke nos ta para pe, esey pakico semper nos kier bin cu diferente evento cu tin esaki como obhetivo pasobra tur di nan eta n conexion cu Dia Internacional di Mucha cu ta tuma luga dia 20 di november y pa e mesun motibo nos ta pensa cu seminario y conferencianan asina por yuda mayornan, yuda famianan y na final bo ta yudando e muchanan lanta den un forma mas saludabel y feliz,” Bergen a enfatisa.

Durante seminario e participantenan lo ricibi hopi informacion, strategia y herment pa yuda guia nan e proceso di co-parent. Pa maximisa e informacion cu ta wordo brinda y pa sigura continuidad, Bergen a splica cu nan ta lo ta dunando un ‘werkboek’.

E idea di e werkboek, el a sigui splica, ta trece cune hopi trabou y hopi informacion pero nan a pensa cu esaki ta e forma corecto pa por yuda pa tin un continuacion tambe. Den e buki aki e participantenan ta haya hopi informacion, pero nan ta bay cu e buki cas den cual tambe nan por haya herment-, recurso- y strategianan cu nan por sigui usa.

“Hopi biaha muchanan ta loke nan ta wak, con nan ta wordo lanta y p’esey ta importante como mayor pa para keto un rato y pensa kico ta loke nos ta haciendo, kico ta e balor, e principionan. E no ta solamente loke nos ta bisa e muchanan, e ta loke nos ta haci, e ehempel cu nos ta duna y esaki nan lo splica e dia aki y pa e motibo ey no ta invita e muchanan si no e mayornan pasobra nan ta lantando, nan ta educando e muchanan,” el a finalisa.