Desde 2016 seleccionnan di futbol di Aruba no por a hunga weganan di cas oficial di FIFA na Aruba pa motibo cu e condicionnan di Stadion Guillermo Prospero Trinidad no tabata cumpli cu e standardnan necesario. Diasabra awo Aruba lo hunga su prome wega clasificatorio di FIFA na cas.
Minister di Enseñansa y Deporte, a anuncia ayera mainta durante un conferencia di prensa cu diasabra 14 di october ta bay tin un wega oficial di clasificacion di e seleccion di Aruba.
E wega ta bay tuma luga den stadion Guillermo Prospero Trinidad y a pesar cu e stadion no ta completamente cla ainda, FIFA a aproba e yerba artificial nobo y haci excepcionnan extraordinario pa asina pa prome biaha, desde 2016, un seleccion di Aruba por hunga un wega oficial clasificatorio, na nan mesun cas.
Minister Croes a indica cu manera ta conoci, bao mandato di e gobierno anterior, e seleccionnan di futbol di Aruba no por a hunga e weganan oficial aki na Aruba y nan mester a biaha pa hunga e weganan di cas afo, esta na Florida of Corsou. Pero cu e renobacion di Stadion Guillermo Prospero Trinidad, cu ta andando ainda, e seleccionnan ya no mester biaha bay afo mas pa hunga nan weganan di cas.
El a splica cu e wega clasificatorio ta cuminsa entre 3or y 4or di atardi y esaki ta pa motibo cu no tin lus ainda instala na e stadion pa por hunga weganan anochi, pero no obstante esaki e turf, e yerba artificial nobo si ta aproba, y ta bay estrena esaki cu un wega clasificatorio entre Aruba y Virgin Islands.
