Seleccion damas U15 cu weganan amistoso den preparacion pa Concacaf U17

Durante un conferencia di prensa ayera tardi, Head of Women Development y Team Manager di e Academia U15 di Arubaanse Voetbal Bond (AVB), Dyane Wiersma, hunto cu coach di e academia, Milvienne Henriquez, a anuncia y a splica mas tocante e weganan amistoso cu lo tin den fin di siman pa recauda fondo pa e seleccion femenino di U-15.

Wiersma a splica cu ta bay tin dos wega amistoso cu ta bay tuma luga e weekend aki, riba dia 9 y 10 di juli, unda team Aruba lo ta hungando contra e ekipo di Corsou U17. E idea tras di e weganan amistoso aki ta pa recauda fondo pa e academia di damas di AVB.

Mayoria di e damanan hungando cu e seleccion, segun Wiersma ta splica, tin aspiracion pa hunga profesional den futuro y nan ta kere firmemente den nan y pa e motibo ey, hunto cu un comision di mayor, nan a dicidi di organisa un evento na unda pa prome biaha na Aruba un seleccion di mucha muhe ta bay hunga na cas.

“Nos ta spera cu pueblo di Aruba por duna nos e apoyo, yena stadion y laga nan sinti kico e ta pa hunga pa un seleccion hungando na cas”, Wiersma a bisa.

E meta di e recaudacion di fondo aki ta pa e academia por bay IMG Academy na Florida, unda e hungadonan por haya un bista con e ta pa bira un hungado profesional y nan lo haya sa e ora, si nan tin e deseo pa bira profesional, cua ta e caminda cu nan mester cana.

Wiersma a indica tambe cu si nan yega asina leu cu e recaudacion di fondo, nan lo haci un biahe tambe cu tur e muchanan muhe pa nan hunga wega amistoso contra e ekiponan di IMG Academy mes, pero tambe pa nan haya un tour, pa mayornan por busca informacion y e muchanan mes por wak si nan por of si nan ta capaz di hunga riba e nivel ey.

Coach Henriquez a elabora mas riba e preparacion y desaroyo di e seleccion, cu aña pasa a sali campeon den e Caribbean Football Union-CFU Challenge Series na Republica Dominicana.

“E preparacion aki tabata uno di un aña largo, cu mi ta kere ta hopi bunita cu AVB por duna e mucha muhenan aki via e academia. E programa aki ta duna tur seleccion un continuidad cu despues cu e muchanan aki a coy campeon aña pasa pa tene e seleccion aki hunto, sigui traha cu nan y esaki ta bunita, cu tin e programa aki den AVB”, Henriquez a expresa.

El a splica cu nan tin un aña trahando duro cu e muchanan muhe di e seleccion y a remarca cu e muchanan muhe aki a marca historia competiendo como full un ekipo di damas den un competencia di mucha hombro, cual a tabatin un resultado exitoso. “Nan a demostra cu nan por bataya cu e fisico, si compara, cu e muchanan homber cu ta mas halto, mas fuerte, e liheresa cu nan tin – y nos por a bataya”, el a agrega.

Coach Henriquez a enfatisa cu esey ta un desaroyo excelente di e muchanan muhe y nan ta contento pa wak cu cada un di e hungadonan por a desaroya individualmente y como ekipo. “Esaki ta algo hopi bunita como entrenador pa por pasa aden”.

Final di juli e seleccion di damas U-15 ta bay ta biahando pa Tampa, Florida caminda nan ta bay ta participando den competencia di Concacaf U17. Coach Henriquez a remarca cu esey ta e motibo pakico nan kier a haya wega amistoso cu ekiponan internacional.

El a sigui splica cu e wega amistoso aki ta e desafio cu e muchanan mester pa yuda cu e preparacion pa fin di juli. Concacaf, el a comenta, ta full un otro competencia compara cu CFU y e ta kere esaki tabata e momento pa un wega amistoso cu nos hermana isla Corsou den un division un tiki mas halto, esta U17.

“Danki na Federacion Futbol Corsou pa acepta e reto y asina bin cu nan seleccion di damas cu a caba di pasa den un trayectorio aña pasa pa e aña aki tremendo”, el a agrega.

Coach Henriquez a subraya cu actualmente na Aruba tin un desaroyo den loke ta futbol femenino mes, competencia di ser femenino solamente, pero e muchanan di e seleccion di damas U15 ta riba un nivel mas halto; y hunga contra mucha homber den un campeonato ta loke nan tabatin mester.

El a enfatisa cu esey tabata un gran parti den nan desaroyo y cu a yuda nan a dal stapnan hopi grandi, cu ya nan ta mas avansa, nan ta mas lihe y nan por cu fisica mas duro. El a menciona tambe cu ambiente mes ta yuda e seleccion aki crece, con nan ta na training, con disciplina nan ta, nan compromiso y con nan ta reta otro den training, locual ta yuda cada un di nan.

Coach Henriquez a remarca cu e muchanan ta miho prepara compara cu aña pasa y en realidad como coach e lo desea pa nan por haya, di aworaki caba den U15, un competencia poco mas halto, of ariba nan mesun nivel, pasobra na U17 ta unda e ranking ta cuminsa y ta unda Concacaf ta cuminsa tira Aruba den pot, cu na momento cu nan cay den un grupo, nan por cay contra Canada, Mexico, Merca, e ekiponan cu ta top. “Kiermen e ora si nos cay den un U15 caba den un competencia asina, e ora nos lo ta miho prepara pa U17 pa ranking”, el a comenta.

Por ultimo Wiersma a splica cu nan ta purbando di mantene e ekipo hunto y durante e eventonan cu ta bay tin den fin di siman nan lo bay ta kedando na e technical center di AVB, na e parti ariba unda tin camber, baño etc. y como staff nan lo keda cu e mucha muhenan pa traha riba e parti mental, e team building pa asina nan por uni nan back den preparacion pa ora nan bay Tampa na final di juli. “Esey ta e idea eigenlijk, pa cuminsa traha riba e aspecto ey pasobra esey tambe ta algo esencial pa e ekipo su animo por ta halto y asina sigur nan lo haci un bon papel”.