Seis persona a perde nan bida y 16 persona a resulta herida ora cu un buraco grandi a guli un bus na central China. E incidente a sucede riba dialuna anochi pafo di hospital na Xining, capital di provincia Qinghai.
Un ‘sinkhole’ ta un buraco cu ta forma ora cu pa motibo di humedad y awa, lodo ta forma bou di superficie. E lodo aki na un dado momento ta haya un caminda pa bay abou, lagando un buraco net bou di e superficie, cu na cualkier momento e capa di superficie ta cay, guliendo tur cos cu tabata riba dje na e momento ey.
CCTV video ta mustra un explosion paden di ‘sinkhole’ despues cu e bus y esunnan para na banda a cay den e buraco. Tin varios buraco similar na China cu a yega ocasiona morto den ultimo añanan.
E video ta mustra ora cu hende tabata wardando pa bus na e parada y nan a logra core ora cu nan a wak e bus a cuminsa cay den e buraco. Un cantidad di persona a bay hunto pa purba rescata e pasaheronan di e bus, pero tabata cauteloso pasobra e buraco ta keda habri.
Segun medionan estatal, e sinkhole a bay casi 10 meter amplio. No ta cla cuanto persona tabata den e bus na e momento di e incidente. Ta culpa trabou di construccion pa sinkhole na China y e desaroyo cu ta bay lihe den e pais.
Na 2018, cuatro persona a muri despues cu un sinkhole a habri na un luga druk di e ciudad di Dazhou, na sur occidente di China. Na 2013, un incidente similar a mata 5 persona na e estado industrial den sur di Shenzhen.
