Cuatro morto y siete herido tabata e resultado inicial di un tiroteo, cu a tuma lugar diaranson na Hospital Roosevelt, situa na sur di Ciudad di Guatemala, Nery Ramos, director di polis di Guatemala a informa.
Mas laat autoridad a informa cu seis persona a muri en total, y 12 mas a keda herida despues cu un grupo di miembro di pandiya Mara Salvatrucha, a yega te na e hospital aki, pa rescata un compañero cu tabata deteni, autoridad local a informa.
E hefe di polis a bisa cu tabata un atake directo contra guardianan di e sistema penitenciario di Guatemala. E problema a cuminsa supuestamente pa pandiyeronan cu tabata purba di rescata un prizonero, cu a ser hiba pa e guardianan aki na hospital Roosevelt.
“Tabatin un atake den area di emergencia di hospital aki, pasobra varios guardia di sistema penitenciario tabata na e hospital, ora cu nan a hiba un prizonero, cu tabata mester atencion medico”. Te diaranson atardi autoridad tabatin un rapport di dos guardia y dos hende civil cu a muri den enfrentamento ey,” el a bisa.
Atake a tuma lugar na un area di emergencia di Hospital Roosevelt, unda Anderson Daniel Cabrera Cifuentes a ser hiba pa haya atencion medico urgente. Cifuentes ta miembro di e grupo criminal “Mara Salvatrucha” y tin condena pa varios asesinato.
Durante varios minuut, e hospital tabata un campo di enfrentamento entre pandiyero y autoridad di seguridad. Atacadornan arma cu fusil di asalto, a logra libera Cabrera Cifuentes.
Ramos a sigura cu polis di Guatemala a mustra su indignacion pa e situacion aki. Polis a captura cinco pandiyero, cu tabata huy den un auto. Polis a confisca dos scopet, cu pandiyeronan a usa pa ataca e personanan cu a muri.
Director di hospital Roosevelt, Carlos Soto a confirma e atake. El a bisa cu tin varios morto y hende herida. El a bisa cu e suceso ta un “barbarie” y cu e sicarionan a logra libera un prizonero cu tabata den hospital pa haya atencion medico.
