Seis oficial militar Ruso, actual y retira, a busca di interumpi, a traves di hacking di computer, eleccion Frances, Olimpiada di winter, y negoshi- y hospitalnan Mericano, segun un acusacion di departamento di Husticia revela ayera.

Esaki ta detaye atakenan destructivo riba un variedad amplio di obhetivonan, y ta implica e mesun unidad di Kremlin cu a interferi den eleccion Mericano 2016.

E documento ta acusa e seis militar, tur cu ta bisa ta oficialnan den e agencia militar Ruso conoci como GRU, di atakenan di hacking cu fiscalnan ta bisa tabatin meta di reforsa e interesnan geopolitico di e Kremlin, y tambe como retribucion contra esnan percibi como enemigo.

Nan ta inclui atake contra planta electrico di Ucrania; un operacion ‘hack-and-leak’ dirigi riba e partido politico di presidente Frances, Emmanuel Macron den e dianan prome cu eleccion 2017; esfuersonan pa castiga organisadornan di Olimpiada cu a prohibi atletanan Ruso pa doping; y pa impedi un investigacion riba e venenamento sospecha cu agente nervioso di un ex-spion Ruso y su yiu muhe.

E documento no ta acusa e sospechosonan den conexion cu interferencia riba eleccion Mericano, maske e oficialnan ta parti di e mesun unidad di inteligencia militar cu fiscal a bisa a interferi den eleccion presidencial 2016 door di hack cuentanan di e-mail democrata. Un di e seis acusadonan den e caso anuncia ayera tabata entre oficialnan di inteligencia militar Ruso acusa di hacking den investigacion di consehero special Robert Mueller.

E documento di 50 pagina, entrega den corte federal na Pittsburgh, tambe ta acusa e hackernan di destrui software malicioso na 2017, cu a afecta computernan rond mundo, incluyendo na un hospital na Pennsylvania y un compania farmaceutico. E supuesto conspiracion criminal cu Departamento di Husticia ta referi ta permiti fiscalnan inclui acusacion di victimanan cu no ta basa na Merca.

Ningun di e seis acusadonan actualmente ta den custodia, pero e Departamento di Husticia den añanan a acusa hackernan stranhero in absentia cu e meta pa crea un mensahe di disuacion.

“Ningun pais a crea un arma di su capacidadnan cibernetico mesun maliciosa- y iresponsablemente cu Rusia, sin cuidao causando daño colateral sin precedente pa busca bentaha tactico chikito segun ta sirbie of pa maldad”, Procurador General interino, John Demers, oficial top di seguridad nacional a bisa na un conferencia di prensa anunciando e caso.

E acusacion ta detaya caracteristicanan tocante atakenan di hack cu den algun instancia ya a ricibi atencion significante pa e destruccion cu nan a causa.

E controversia conoci como e ‘Macron Leaks’, por ehemplo, tabata e leak di mas di 20mil e-mail vincula na campaña di Macron den eleccion di 2017 den e dianan prome cu su victoria. E participacion di bots a genera pregunta tocante e posible participacion di Vladimir Putin y gobierno Ruso.

E leak, cual a ricibi hopi atencion di medionan di comunicacion Frances, a ser comparti pa WikiLeaks y varios activista di ‘alt-right’ riba Twitter, Facebook y otronan.

Depues cu Comite Olimpico Internacional (IOC) a castiga Rusia pa conspiracion di doping na Olimpiada di Winter na Sochi, hackernan a enfoca riba agencianan deportivo rond mundo.

A publica recordnan medico di mas di 250 atleta, y datonan confidencial di algun di e organisacionnan deportivo mas grandi di mundo – Olimpiada, track and field mundial, y FIFA – a ser horta, den loke fiscalnan Mericano a bisa tabata represalia pa e castigo di doping.

Otro organisacionnan relaciona cu Olimpiada tambe a bira victima di hacker: e cuerpo mundial di track and field, cu a suspende Rusia na 2015; agencia anti-doping Canades, un critico di Rusia; Corte di Arbitrahe pa Sport, cual a duna veredicto contra algun atleta Ruso.