Recientemente Cuerpo di Polis Aruba a informa tocante e campaña di prevencion pa loke ta trata “No mas Morto den trafico” unda lamentablemente 6 accidente fatal a tuma luga den menos di cinco luna di e aña aki.

Pa esaki, altocomisario drs. Ramon Arnhem ta pone enfasis cu cada accidente fatal ta di mas cu ta laga famianan den tristesa y kibra pa resto di nan bida. Cuerpo Policial Aruba lo sigui tin control pisa den trafico.

“Nos ta haci un suplica si abo ta bou influencia no stuur. Busca un amigo responsabel, automobilistanan como tambe coredo di brommer, bicicleta y peaton cu ta forma parti di nos trafico mantene boso na e ley y reglanan pa asina tur hende por yega nan destino sigur.” A sigura.

Pa e mesun motibo aki, ta importante pa Bon Dia Aruba como medio di comunicacion responsabel, por conscientisa y trece dilanti e campaña crea denomina Trafico Sigur e cual tin como prioridad informa y conscientisa comunidad tocante siguridad den trafico. Sea ta un residente local of un bishitante kende ta desea di explora e isla bunita, siguridad riba caminda of canto di caminda ta primordial.

Siguridad den trafico ta enfoca riba diferente punto como por ehemplo, e riesgonan di usa telefon mientras ta core auto e cual ta aumenta e riesgo di causa accidente cu 23 biaha mas.

Skirbi of papia na telefon ta desvia e atencion di e conductor for di riba e caminda, loke ta conduci na un deterioro di consciencia di e realidad di chauffeur.

Ora cu wowonan bay riba un pantaya di e telefon of ta skirbi algo den e telefon esaki ta causa distraccion visual y cognitivo, cu ta afecta significativamente e capacidad di e chauffeur pa detecta y reacciona riba e peligronan na tempo.

Observando un mensahe riba telefon den auto ta tuma 5 seconde minimo, si e persona ta coriendo 40 pa 45 KM di velocidad lo a cubri un distancia igual na mita veld di futbol sin a mira caminda y lo no mira un auto of motociclista cu break dilanti, ni un rotonde cu por ta cerca of hasta un peaton.

Estudionan a demostra cu ora usa un telefon celular mientras ta core auto ta afecta negativamente e habilidad di mantene e auto den liñanan di camindanan, mantene velocidad corecto y tambe e ta reduci e habilidad di calcula distancia.

Multa di 10.000 florin pa core cu telefon den man

Por lo tanto, no ta permiti pa tin e telefon “den man” ora ta core auto segun articulo 7a di Landsbesluit Verkeersregel AB 1999. Si un persona ta ser gara cu telefon den man ora di core auto, e persona por haya un multa di maximo 10.000 florin of un sentencia maximo di 3 luna.

Biniendo back riba e peticion di altocomisario, aki na Aruba pa siman por nota un cantidad grandi di caso nan di incidentenan y accidentenan den trafico cu ta ser ocasiona pa core bao di influencia di alcohol.

Como procedura y manera ley ta stipula, e conductor cu ta sospecha di core bao influencia di alcohol, lo mester haci un alcohol test, cual aki na Aruba ta tuma luga primeramente pa medio di un ‘Breathalyzer’ (via rosea). E sospechoso mester supla y e resultado no mag di pasa 220 ug/l pa rosea supla.

Multa pa core auto bao influencia por yega hasta 25.000 florin

Den cierto caso tambe por test e nivel di alcohol door di haci un test di sanger. E resultado no por surpasa 0.5 mg per 100ml di sanger. Si ta ser comproba cu e persona ta surpasa e limite di alcohol, por haya un multa di maximo 25.000 florin of un sentencia di maximo 2 aña.

E opcion mas sigur ta scoge pa keda sin consumi alcohol si ta bay core auto. Hasta un cantidad minimo por afecta e habilidad pa maneha un auto. Tampoco tin un manera sigur cu por constata of controla cu ta den limite di alcohol legal.

Alcohol ta reduci e funcion di e celebro, afectando pensamento, rasonamento y coordinacion di musculonan. Tur e habilidadnan aki ta esencial pa maneha un vehiculo cu siguridad, mas e cantidad di nivel di alcohol eleva den curpa di un persona, mas e efectonan negativo riba su sistema nervioso central ta aumenta.

Den bista di e preocupacionnan di comunidad pa motibo di cantidad di casonan di accidente, unda tambe tin caminda cu peatonnan ta ser trapa y hasta ultimo temponan algun a perde nan bida, Comision di Trafico Sigur a comparti tips importante pa conscientisa tanto chauffeurnan pero tambe peatonnan, unda tur usuario tin un responsabilidad comparti ora cu nan ta participa den trafico y ta esencial cu ambos partidonan keda vigila proactivamente nan movecionnan den trafico:

No parkeer riba acera, ni tampoco riba zebrapad;

Percura pa cumpli cu reglanan di trafico;

Sea alerta na tur momento cu ta manehando, pa peatonnan cu por ta canando canto di caminda of cu ta bay crusa, specialmente caminda cu tin zebrapad, duna preferencia;

Evita di distrai pa telefon, musica demasiado duro of otro personanan den auto na momento cu ta manehando;

Respeta derechonan di peaton: Duna preferencia na peaton na crusada y interseccionnan caminda tin un zebrapad y cumpli limitenan di velocidad;

Eherce precaucion ora cu ta yega na areanan unda por tin mas peaton presente; manera scolnan, establecimentonan comercial y zonanan residencial.

E casonan di accidente fatal por ser preveni si tin un comunidad mas enfoca den educacion pa un trafico sigur, mirando cu mayoria di casonan alcohol sigur ta un factor involucra ta importante pa trece e informacion aki dilanti.