20jul FD seguro no kier cubri daño (1).jpg

Ciudadano hopi disgusta cu compania di seguro cu no kier cubri gasto di accidente ocasiona pa nan cliente. Ta teme cu e unico posibel solucion ta pa hiba e compania di seguro Citizens corte. E ciudadano ta cunsumi cu seguronan ta cobra placa, pero ora ta bin pa nan saca placa, e ta un caminda di cruz.

 

24 di October 2015 a tuma luga un accidente riba caminda di Paradera bayendo Sero Blanco na altura di e luga cu ta bende piesa Surinam, entre un auto marca Chevrolet Spark y un Nissan March. E Chevrolet ta esun cu a ocasiona e accidente cual a sali tambe riba e rapport di e compania TRS. Diario a cubri e accidente y nan tambe a publica e informacion aki pues cu e Chevrolet a ocasiona e accidente y e Nissan ta esun gana. Polis tambe tabata na e sitio trahando rapport e momento ey.

 

Ambos auto ta sigura

Ambos auto ta sigura, e Chevrolet ta sigura cu Citizens y e Nissan ta sigura cu Boogards. Ta te na januari cu a warda pa rapport di polis keda cla, a yama seguro pa wak con a para, y a wordo notifica cu tur cos ta cla y e señora a wordo cubri caba. Esaki a straña e persona cu a yama, como cu ta nan a gana y ta nan mester a ricibi placa y no e señora. Ora cu esunnan cu a yama cu ta di e auto Nissan a realisa kico a pasa, seguro a bisa cu ta a base di e rapport cu polis a entrega nan a paga e señora y pues cu e rapport di polis a wordo traha fout.

 

Version ocupante Nissan

Un di e ocupantenan di e Nissan Sra. Maduro, cu a acerca Bon Dia Aruba cu e informacion aki ta splica cu desde januari a cuminsa e ora cu e caminda pa polis corigi e rapport pa haya cubri daño di cliente di Citizens a ocasiona cu Citizens no kier para responsabel pe te dia di awe. Citizens a bisa cu nan ta traha a base di rapport di polis, sinembargo a pesar cu polis a traha un declaracion nobo indicando cu e rapport anterior ta fout, Citizens no kier reconoce esaki. Locual cu ta di lamenta pasobra Sra. Maduro ta a.o sin por bay traha desde cu e accident a tuma luga pa motibo cu e ta parcialmente ciego na su banda di wowo robes. Desde e tempo ey AZV a cubri diferente operacion y bishita na specialista pa logra mehora bista di Sra. Maduro. Pa di prome cornea di Sra. Maduro a habri ⅔ parti a causa di e golpi. Pa su mañan 8or di mainta e mester a wordo opera pa dokter Jacobs unda cu el a haci un operacion chikito pa cose e cornea bek. E dañonan cu a sufri ta cu lens natural di wowo a bin afo, gel a bin afo, y e retina a sufri daño. “Mi mester a wordo 2 luna pa e mashin di scan wowo yega Aruba pa asina determina cu mas detaye kico ta tur e daño, despues di esaki a constata tur e dañonan ariba menciona. Na Februari ta prome biaha cu Sra. Maduro a biaha pa Colombia, cubri pa AZV pa wak kico por haci pa e y trata e daño causa na e retina. A opera e retina na Colombia inmediatamente mirando e daño y e riesgo cu e tabata core pa perde su wowo. Nan a pega e retina bek cu un tipo di silicon. Despues di dos luna e a bolbe Colombia bek pa saca silicon y pone un lens secundario cual no por a tuma luga, pasobra e dokter a conseha pa warda dos luna mas prome cu haci caba, ya cu tin hopi complicacion na e wowo como cu tin un cornea transplanta. Awo mi ta bayendo bek pa Colombia pa hinca e lens y pa wak si por dun’e mas tanto visibilidad bek cu ta posibel.” Segun Sra. Maduro dokter no por garantisa cu e ta bay mira bek manera prome cu e accident. Sra. Maduro su trabou ta tras di un computer y e no por eherce su funcion si su bista no ta bon cual ta haci cu e tin gran perdida den su entrada.

 

Citizens ta considera declaracion di polis invalido

Citizens a bisa Sra. Maduro cu e cambio (declaracion) cu polis a haci pa indica cu e rapport inicial a wordo traha malo, no ta algo cu nan ta considera valido. Polis no por elimina e rapport inicial tampoco y a bisa cu e rectificacion ta locual cu e compania di seguro mester acepta y si no, cu Sra. Maduro por lanta un caso contra e compania di seguro cu no e kier paga. Mientrastanto compania di seguro Boogaards ta haciendo tramitenan pa tuma e placa paga na e persona cu a ocasiona e accidente manehando e Chevrolet. Pues Boogaards si a acepta e rectificacion di polis. Sra. Maduro ta wordo manda di cashi pa muraya y e no sa mas kico pa haci den e caso aki cu ya 9 luna a pasa. Locual cu Sra. Maduro kier pa e seguro cubri ta e dañonan na e auto cual e tabata un ocupante, su gastonan medico pa su wowo y tambe e 20% di salario cu e ta perdiendo for di su salario desde cu e no por traha y ta cobrando 80% pa motibo di e accidente.

 

Polis

Bon Dia Aruba a tuma contacto cu specialista di trafico cu a splica cu ora cu un seguro no kier cubri algo a pesar di declaracion di polis, e ta bira un caso civil y nan ta recomenda e ciudadano pa bay corte. E ta un problema cu ta tuma luga hopi unda cu seguro no kier cubri dañonan, lamentablemente.